550-ից մաքսիմում 150 հեկարը կլինի հնձել. Թալիշի արտերի մեծ մասի բերքը չեն հավաքի

News.am-ը գրում է.

Լեռնային Ղարաբաղի Հանրապետության Մարտակերտի շրջանի Թալիշ գյուղում հացահատիկային մշակաբույսերի բերքահավաք են անում միայն այն հողատարածքներում, որոնք ադրբեջանական կողմի թիրախավորման տակ չեն գտնվում: Այս մասին NEWS.am-ին ասաց Թալիշի գյուղապետ Վիլեն Պետրոսյանը՝ նշելով, որ 550 հեկտարից 400-ում հնարավոր է, այդպես էլ չկարողանան բերաքահավաք անել: Նրա խոսքով, այս պահին չեն կրակում:

«Էն հատվածը, որ անվտանգ է, էդտեղ են հնձում երկու կոմբայն, մյուս հատվածները, որտեղ խփել են նախորդ անգամ, կոմբայնները մտադիր չեն մտնել: 550-ից մաքսիմում 150 հեկարը կլինի հնձել, մյուսները վտանգավոր են: Այդ հեկտարները մնում են օդում կախված»,- ասաց գյուղապետը՝ հավելելով. «Այդ խնդրով զբաղվում է Կարմիր խաչը, նախորդ օրն էլ Կարմիր խաչի աշխատակիցները եղել են գյուղում»:

Գյուղապետը նշեց, որ նախորդ անգամ, երբ հակառակորդը կրակ էր բացել գյուղատնտեսական աշխատանքներ իրականացնող քաղաքացիական անձանց ուղղությամբ, իրենք նախապես դիմել էին Կարմիր խաչի միջազգային կոմիտեին, որն էլ փորձել էր համաձայնություն ստանալ, որ բերքահավաքի ժամանակ դիտարկում անցկացնեն անվտանգությունն ապահովելու համար,  սակայն հակառակ կողմը չէր համաձայնվել:

«Ասել էին՝ մենք առանց Կարմիր խաչի հունձ ենք կատարում, թող իրենք էլ անեն, չենք կրակի: Բայց արի ու տես, որ կրակեցին»,- ասաց գյուղապետը:

Հիշեցնենք, որ հունիսի 30-ին` ժամը 14:10-ի սահմանում, Թալիշ գյուղի մերձակա տարածքում հացահատիկային մշակաբույսերի բերքահավաքի ժամանակ հակառակորդը պարբերաբար հրաձգային զինատեսակներից խախտել էր հրադադարի պահպանման ռեժիմը՝ թիրախ ընտրելով սահմանին մերձակա գյուղատնտեսական նշանակության տարածքներում աշխատանքներ իրականացնող քաղաքացիական անձանց: