Ջոն Քերին հորդորել է Հայաստանի եւ Ադրբեջանի նախագահներին՝ շարունակել խաղաղ գործընթացը

ԱՄՆ պետքարտուղար Ջոն Քերին հունիսի 30-ին Հայաստանի եւ Ադրբեջանի նախագահներ Սերժ Սարգսյանի եւ Իլհամ Ալիեւի հետ կայացած հեռախոսազրույցների ընթացքում հորդորել է նրանց՝ շարունակել խաղաղ գործընթացը Լեռնային Ղարաբաղի շուրջ: Քերին նրանց հետ հեռախոսազրույցներում նշել է այն պայմանավորվածությունների կատարման մեծ կարեւորության մասին, որոնք հունիսի 20-ին ձեռք են բերվել Սանկտ Պետերբուրգում: Այդ մասին հունիսի 30-ի երեկոյան հաղորդել է ԱՄՆ Պետդեպարտամենտի մամուլի ծառայությունը:

Քերին նշել է, որ «Լեռնային Ղարաբաղի շփման գծում եւ հայ-ադրբեջանական սահմանում կրակի դադարեցումը վերջին շաբաթներին հիմնականում պահպանվում է, եւ հորդորել է նախագահներին՝ խուսափել լարվածությունից` խաղաղ գործընթացն առաջ տանելու համար»:

Նա նաեւ նշել է մայիսի 16-ի Վիեննայի եւ հունիսի 20-ի Սանկտ Պետերբուրգի հանդիպումներում ստանձնած պարտավորությունների կատարման կարեւորությունը»,-ասված է փաստաթղթում:

Բացի այդ, ամերիկյան դիվանագիտության ղեկավարը «հավաստել է Միացյալ Նահանգների կողմից աջակցությունը բովանդակային բանակցություններին, որոնք կարող են բերել համապարփակ կարգավորման, եւ հաստատակամորեն կոչ է արել նախագահներին՝ երկխոսությունը շարունակել ԵԱՀԿ Մինսկի խմբի համանախագահների հովանու ներքո»,-հաղորդել Է Պետքարտուղարության պաշտոնական կայքը: