Տրանսպորտի և կապի նախարար Գագիկ Բեգլարյանը մեկնում է Վրաստան` Վերին Լարսի ճանապարհի հետ կապված

ՀՀ տրանսպորտի և կապի նախարար Գագիկ Բեգլարյանը հունիսի 30-ին կմեկնի Վրաստան` Վերին Լարսի ճանապարհի հետ կապված: Այդ մասին լրագրողների հետ զրույցում նշեց ՀՀ վարչապետ Հովիկ Աբրահամյանը:

Նա տեղեկացրեց, որ նամակով դիմել է ՌԴ իր գործընկերոջը՝ Դմիտրի Մեդվեդևին և արդեն կազմակերպվել է 200 քաղաքացու վերադարձը Երևան: «Այս պահին 4-րդ թռիչքը ընթացքում է: Վերին Լարսում աշխատանքներն իրականացնում է Վրաստանի կառավարությունը: 2-3 շաբաթ ժամանակ են խնդրել, որպեսզի ավարտեն»,- «Արմենպրես»-ի հաղորդմամբ՝ ասաց Հովիկ Աբրահամյանը: 

Հունիսի 23-ին` ժամը 16.40-ի սահմաններում Վրաստանի ՆԳՆ ԱԻ դեպարտամենտից տեղեկություն էր ստացվել, որ Վերին Լարսի անցակետից մոտ 2 կմ հեռավորության վրա (Վրաստանի տարածքում), Թերեք գետի վարարման հետևանքով ավտոճանապարհի 500-600 մ հատված ամբողջովին փլուզվել է, և այդ պատճառով փակվել է ՌԴ-Վրաստան սահմանային անցակետը: Անվտանգության նկատառումներից ելնելով նշված ավտոճանապարհով արգելվել է բոլոր տեսակի տրանսպորտային միջոցների երթևեկությունը:

Ռուսաստանի Դաշնության արտակարգ իրավիճակների նախարարության ԱՆ-148 ինքնաթիռը հունիսի 30-ին «Զվարթնոց» միջազգային օդանավակայանում վայրէջք է կատարել 3 անգամ` Հայաստան տեղափոխելով Լարսի անցակետի փակման հետևանքով հայրենիք մուտք գործելու հնարավորությունից զրկված ՀՀ 144 քաղաքացու: Կիրականացվի մեկ` 4-րդ չվերթ, և ՌԴ ԱԻ նախարարության ինքնաթիռը, նախնական տվյալներով, Երևանի «Զվարթնոց» միջազգային օդանավակայանում վայրէջք կկատարի հունիսի 30-ին, ժամը 20:00-ին: