Քաղաքագետի համոզմամբ՝ նույնիսկ պետերբուրգյան եռակողմ հանդիպումից հետո հակամարտության խաղաղ կարգավորման հնարավորությունները չեն աճել

Քաղաքագետ Հրանտ Մելիք-Շահնազարյանի կարծում է, որ Թուրքիան վերջին տարիներին անընդմեջ փորձել  էր ուժեղացնել իր ազդեցությունը տարածաշրջանում, ինչն արել է Հայաստան-Ադրբեջան հակամարտության սրացման հաշվին:

«Սակայն ապրիլյան իրադարձությունների ընթացքում այն չէր կարող Ադրբեջանին տալ երաշխիքներ, որ այս հարձակումը հաջողված կլինի: Եվ բոլորի համար էլ ակնհայտ էր, որ այստեղ նաեւ առկա էր  այդ ռիսկի գործոնը, որ կբախվեն Թուրքիայի եւ Ռուսաստանի շահերը: Ռուսաստանի համար, որը կրում է պատժամիջոցներ, ներգրավված է Սիրիայի պատերազմում, նման պայթյունավտանգ տարածաշրջանի ապակայունացումը մեծ մարտահրավեր է»,-«Արմենպրես»-ի փոխանցմամբ՝ նշեց քաղաքագետը:

Նրա խոսքով՝ թե՛ Սիրիայում, թե՛ Ուկրաինայում տիրող իրավիճակն էր թույլ տվել Ադրբեջանին մտածել, որ հարձակումը չի առաջացնի միջազգային քննադատության լայն ալիք:

«Լինելով ներկա պետերբուրգյան եռակողմ հանդիպմանը, կարող եմ փաստել, որ  չնայած Ռուսաստանի՝ հակամարտությունը կարգավորելու մեծ ջանքերին՝ այն որեւէ առարկայական ազդեցություն չունեցավ Ադրբեջանի դիրքորոշման վրա, նույնիսկ հանդիպումից հետո խաղաղ կարգավորման հնարավորությունները չաճեցին, ինչը մտածելու տեղիք է տալիս, որ պետք է փնտրել այլ ճանապարհներ»,- եզրափակեց քաղաքագետը: