Ադրբեջանն աշխարհում իրեն ճանաչել է տալիս կաշառքով

Ադրբեջանն աշխարհում իրեն ճանաչել է տալիս մեկը մյուսի հետեւից բացահայտվող կաշառատվությունների հետ կապված աղմկալից իրադարձություններով:

Այս մասին վկայակոչելով «Ազզադլըգ» թերթը, facebook-ի իր էջում գրում է Ադրբեջանի գլխավորընդդիմադիր Ժողովրդական ճակատ կուսակցության առաջնորդԱլի Քերիմլին` անդրադառնալով Ադրբեջանում քաղաքական բանտարկյալների առկայությունը քողարկելու համար Եվրոպայի Խորհրդի խորհրդարանական վեհաժողովում իտալացի պատգամավոր Լուկա Վոլոնտեին ադրբեջանական իշխանությունների կողմից 2,4 մլն եվրո կաշառք տրվելու փաստի բացահայտմանը:

«Ադրբեջանն աշխարհում իրեն ճանաչել տվեց Պանամայում օֆշորային հաշիվներով, Լոնդոնում 38 առանձնատներ գնելով, մանաթի տպագրման ժամանակ Ավստրիայում միլիոնավոր դոլար «օտկատ»-ով, օֆշորի հաշիվներով Կառլովի Վարիում հյուրանոցներ եւ հանսգտյան տներ գնելով եւ խոշոր փողերի այլ լվացումներով: Այն աստիճանի են ճանաչել տվել, որ կոռումպացված ադրբեջանական իշխանությունների թակարդից ազատվելու համար ԱՄՆ կոնգրեսականները վերադարձրել են ժամանակից Ադրբեջանից ստացած բոլոր նվերները:

Այժմ էլ Իտալիայում են իրենց ճանաչել տալիս: Իտալիայի բոլոր ԶԼՄ-ները գրում են կոռումպացված Ադրբեջանի մասին: Գրում են, որ 2013 թվականին ԵԽԽՎ-ում քաղբանտարկյալների հետ կապված զեկույցի ընդունումը կանխելու, անմեղ մարդկանց ավելի երկար ժամկետով բանտոմ պահելու համար Ադրբեջանի իշխանությունը Իտալիայի ներկայացուցչական պատվիրակության ղեկավար Լուկա Վոլոնտեին 2,4 մլն եվրո կաշառք է տվել», -գրում է Քերիմլին:

Ադրբեջանի ժողովրդավար ուժերի եւ ընդդիմության «Ազգային Խորհուրդ» միության նախագահ Ջամիլ Հասանլին էլ facebook-ի իր էջում այդ առնչությամբ հայտարարել է, որ շուտով Ադրբեջանի վերաբերյալ ավելի մեծ խայտառակություններ կբացահայտվեն:

«Վաղուց է հայտնի երկար տարիներ Ադրբեջանի իշխանության կեղտոտ գործողոթւյունների, ոչ միայն իրեն, այլ աշխարհը եւս կաշառքով, կոռուպցիայով վարակելու մասին: Այս երկիրը ոտքից-գլուխ կաշառքի եւ կոռուպցիայի մեջ է, ոչ մի պաշտոնյա չի խորշում այդ խայտառակությունից: Լուկա Վոլոնտեին 2,4 մլն եվրո կաշառքը տրվել է Ադրբեջանի խորհրդարանի պատգամավորներ Էլխան Սուլեյմանովի եւ Մուսլիմ Մամեդովի միջնորդությամբ, որպեսզի կանխվի 2013 թվականի հունվարի 23-ին ԵԽԽՎ-ում «Ադրբեջանում 85 քաղբանտարկյալների մասին» գերմանացի պատգամավոր Շտրասերի պատրաստած զեկույցի ընդունումը:         Դրանով ԵԽԽՎ-ն Ադրբեջանի իշխանությանը քաղաքական բռնաճնշումներն ընդլայնելու քարտ-բլանշ տվեց: Շուտով Ադրբեջանի վերաբերյալ նոր խայտառակություններ էլ կբացահայտվեն: Գաղտնիք չէ, որ ԵԽԽՎ Ադրբեջանի գծով համազեկուցող Պեդրո Ագրամունտը, որը ընտրություններում ԵԽԽՎ դիտորդական առաքելության անդամ էր, միանգամայն աջակցել էր կեղծված ընտրություններն արդարացի անցկացվելու մասին Ռոբերտ Վոլտերի` ընտրություններից հետո արած խայտառակ հայտարարությանն ու պատրաստած զեկույցին: Անպայման կբացահայտվեն նաեւ այն գաղտնիքնե րը, թե ինչու ԵԽԽՎ-ի ներկայիս նախագահ Պեդրո Ագրամունտը պաշտպանել է եւ ընտրությունների կեղծման, քաղբանտարկյալների եւ ժողովրդավարության ոտնահարման հարցերում շարունակում է պաշտպանել Ադրբեջանի իշխանությանը», -նշել է Հասանլին:

Իտալիայի Միլան քաղաքի դատախազությունը ԵԽԽՎ-ում Եվրոպական ժողովրդական կուսակցության խմբակցության նախկին ղեկավար Լուկա Վոլոնտեին, որը հայտնի քաղաքական գործիչ է, մեղադրել է Ադրբեջանից 2,39 մլն եվրո գումար կաշառք ստանալու մեջ:

Իտալական Corriere della Sera թերթը գրել էր, որ այդ գումարի դիմաց Վոլոնտեն Ադրբեջանի ներկայացուցիչներին խոստացել էր «Ադրբեջանում եւ Ստրասբուրգում հանդիպումների ու խորհրդակցությունների ժամանակ աջակցություն հայտնել օտար երկրի քաղաքական դիրքորոշումներին»:

Ըստ թերթի` դատախազությունը կոռուպցիայի եւ հանցավոր ճանապարհով ձեռք բերված փողերի լվացման մեղադրանքներ է ներկայացրել քաղաքական գործչին: Վոլոնտեն մեղադրվում է 2012-2014 թվականներին ադրբեջանական Baktelecom ընկերության հաշիվներից 2,39 մլն եվրո կաշառք ստանալու մեջ: Ենթադրվում է, որ Վոլոնտեն այդ գումարը ստացել է Ադրբեջանի իշխանությունների օգտին քաղաքական գործունեություն իրականացնելու համար:

Լուկա Վոլոնտեի մեղադրական ակտում նշվում է, որ նա պաշտոնական Բաքվի շահերից ելնող «կարճաժամկետ եւ երկարաժամկետ քաղաքական նախաձեռնություններ» է իրականացրել, ինչը, մասնավորապես, արտահայտվել է 2013 թվականի հունվարին ԵԽԽՎ-ում Ադրբեջանում քաղբանտարկյալների մասին հարցի քննարկման ժամանակ: