Հայ հայտնիների երեկոյան զգեստները քննում է ոճաբան Արփինե Կոշտոյանը

Հանրային մարդիկ, ովքեր մշտապես ուշադրության կենտրոնում են, ակամայից դառնում են ճաշակ ու ոճ թելադրողներ: Մեզ հետաքրքրում է՝ որ միջոցառմանը ինչ զգեստով է ներկայացել այս կամ այն հայտնի անձնավորությունը, չլինելով ոճաբան՝ քննում ենք նրա կերպարն ու փորձում որոշել դրա առավելություններն ու թերությունները: Այս պարագայում հետաքրքիր է լսել նաև մասնագետների կարծիքը: Life.panorama.am-ը զրուցել է «ArtBravo Fashion» ստուդիայի ոճաբան Արփինե Կոշտոյանի հետ, ով քննել է հայ աստղերի երեկոյան զգեստները, ոճն ու կերպարները:

Քրիստինե Պեպելյանի զգեստն ընտրված է  նուրբ երանգի մեջ, որը շատ քչերին է սազում: Այս դեպքում բավականին հետաքրքիր է նայվում: Ինքն իր կերպարի մեջ է, ներդաշնակ:

Սիրուշոն ունի ճաշակ, իրեն հատուկ ոճ, որը հնարավոր չէ չնկատել: Նա կարողանում է ստանալ հաջողված կերպարներ. սա ևս այդ դեպքերից է, ամեն ինչ կատարյալ է:

Գիտեմ, որ Անահիտ Սիմոնյանն ինքն է զբաղվում իր ոճով, ինչը ողջունելի է: Ուրախ եմ, որ Հայաստանում օր օրի ավելանում է նորաձևության ոլորտում գործողների թիվը:

Լիլիթ Հովհաննիսյանն իր կերպարում է, նա այնքա՜ն վառ ու գունավոր անձնավորություն է, որ սազում են բոլոր կերպարները:

Նազենի Հովհաննիսյանի ոճում միշտ հավանել եմ այն, որ նա ունի չափի զգացողություն. գիտի՝ որտեղ ինչպես պետք է ներկայանալ: Զգացվում է, որ ինքն իր հանդեպ պահանջկոտ է, ուստի միշտ գրագետ կերպարներով է ներկայանում:

Արմինկան, ինչպես միշտ, յուրահատուկ է, կերպարը ծանրաբեռնված չէ, հետաքրքիր է նայվում: Չկան ակնհայտ թերություններ, միայն ականջօղերի ընտրության հետ համաձայն չեմ:

Սոֆի Մխեյանի դեպքում հավանում եմ այն, որ նա փոփոխվելու առումով բարդույթներ չունի, չի վախենում նորամուծություններից, հետևում է նորաձևության միտումներին: Այս դեպքում ևս իրեն բնորոշ ոճում է: