«Բազե»-ն կանցկացվի օգոստոսի 22-28-ը

 «Բազե-2016» համահայկական երիտասարդական հավաքը կանցկացվի օգոստոսի 22-28-ը: Ինչպես ամեն տարի՝ Ծաղկաձորում կհամախմբվեն շուրջ 500 երիտասարդներ Հայաստանից, Արցախից, Ջավախքից և սփյուռքից։ Այս մասին «Արմենպրես»-ին տեղեկացրին Հայաստանի երիտասարդական հիմնադրամից:

Հիմնադրամի կողմից կազմակերպվող «Բազե» հավաքի հիմնական նպատակն է բացահայտել տաղանդաշատ երիտասարդների, նրանց տալ ինքնադրսևորման հնարավորություն, մասնակիցների շրջանում սերմանել թիմային աշխատանքի և արդար մրցակցության ոգի։

Հավաքի ընթացքում մասնակիցներն ուժերը կչափեն սպորտային, մշակութային և ինտելեկտուալ խաղերում։ Այս տարի ծրագրում կատարվել են որոշակի փոփոխություններ։ Մասնավորապես, մշակութային մրցույթներում ավանդական մրցաձևերին (երգ, պար, նկարչություն, նորաձևություն) գումարվել են նաև հումորային համարի և փոքրիկ ֆիլմի պատրաստումն ու ներկայացումը։

«Բազե» հավաքի տնօրեն Հրաչյա Ստեփանյանը նկատում է, որ այդպիսով նախ փորձ է արվել հավասարակշռել սպորտային և մշակութային մրցույթները, քանի որ մինչ այդ մարզական խաղերն ավելի շատ էին։ Բացի այդ, հումորային համարն ու ֆիլմի պատրաստումը թույլ են տալիս բացահայտել երիտասարդների ունակությունները բոլորովին այլ ասպարեզներում։

Հրաչյա Ստեփանյանը նկատում է, որ այս տարի հավաքի ընթացքում անցկացվելու են նաև ռազմական պատրաստության դասընթացներ, որոնց ընթացքում մասնակիցները սովորելու են մարտարվեստ, հաղթահարելու են տարբեր փորձություններ, անցնելու են առաջին բուժօգնության դասընթացներ։

Նշենք, որ «Բազե» երիտասարդական հավաքն առաջին անգամ անցկացվել է 2002 թվականին, և ամեն տարի այն սպասված ու պահանջված ծրագիր է մեծաթիվ երիտասարդների համար։