Կեղծ փաստաթղթերով հատել է Հայաստանի սահմանը

Երեւան քաղաքի Մալաթիա-Սեբաստիա վարչական շրջանի ընդհանուր իրավասության դատարանում հարուցվել է քրեական գործ Գերմանիայից Հայաստան կեղծ փաստաթղթերով մուտք գործելու եւ Հայաստան թմրամիջոց տեղափոխելու դեպքի առթիվ:

Ըստ Դատական տեղեկատվական համակարգի՝ Կարեն Ալոյանին մեղադրանք է առաջադրվել այն բանի համար, որ նա Գերմանիայի Դեմոկրատական Հանրապետությունից արտաքսումից հետո, ԳԴՀ վերադառնալու նկատառումից ելնելով՝ կեղծ տվյալներով, կեղծ փաստաթղթով 2015թ. հոկտեմբերին հատել է ՀՀ պետական սահմանը եւ մուտք գործել Հայաստան: Բացի այդ մաքսանենգությամբ ՀՀ սահմանով իր հետ փոխադրել է բուպրենորֆին տեսակի թմրամիջոց:

Վերջինս մեղադրվում է միանգամից մի քանի հոդվածներով: Այսպես, Ալոյանին մեղադրանք է առաջադրվել Քրեական օրենսգրքի 325-րդ եւ 329-րդ հոդվածների առաջին մասով եւ 215-րդ հոդվածի երկրորդ մասի: Սրանցից առաջինը նախատեսում է նվազագույն աշխատավարձի երկուհարյուրապատիկից չորսհարյուրապատիկի չափով տուգանք, կամ առավելագույնը մեկ տարի ժամկետով ուղղիչ աշխատանքներ, կամ առավելագույնը երկու տարի ժամկետով ազատազրկում: Երկրորդը՝ կամ նվազագույն աշխատավարձի հարյուրապատիկից երկուհարյուրապատիկի չափով տուգանք, կամ առավելագույնը երեք տարի ժամկետով ազատազրկում: Երրորդն էլ՝ չորսից ութ տարի ժամկետով ազատազրկում՝ գույքի բռնագրավմամբ կամ առանց դրա:

Նրա նկատմամբ որպես խափանման միջոց է կիրառվել կալանավորումը:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ,քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի`օրինական ուժի մեջ մտած դատավճռով:

Քրիստինա Տեր-Մաթեւոսյան