Կարելիայում փակվում է լճափի ճամբարը, որտեղ երեխաներ են զոհվել

Կարելիայում Սյամոզերո լճի ափին գտնվող ճամբարը, որտեղ երեխաներ են զոհվել, փակվում Է: Այս մասին հայտնել Է Ռուսաստանի արտակարգ իրավիճակների նախարար Վլադիմիր Պուչկովը: «Ճամբարը փակվում Է: Կատարում ենք երեխաներին ծնողներին հանձնելու բոլոր ընթացակարգերը»,- ասել Է նա աշխատանքային խորհրդակցության ժամանակ:

Նախարարին զեկուցել են, որ ընդամենն այդ ճամբարում  գտնվում Է 189 երեխա: Նրանցից 58-ը՝ Մոսկվայից եւ մարզից:   

Իր հերթին ՌԴ-ի Քննչական կոմիտեի պաշտոնական ներկայացուցիչ Վլադիմիր Մարկինը հունիսի 20-ին «Վեստի ՖՄ» ռադիոկայանի եթերում հայտնել Է, որ ձերբակալված Է Կարելիայի Սյամոզերո լճում երեխաների մահվան գործով հինգերորդ կասկածյալը:    

«Այսօր գիշեր մենք ձերբակալեցինք եւս մեկ դաստիարակ-ջոկատավարի՝ ծնված 1997 թականին: Նա հրահանգիչ չի եղել, ինչպես եւ մնացած կասկածյալները»,- ասել Է Մարկինը:  

Ավելի վաղ գործով ձերբակալվել են «Սյամոզերո» բնայգի-հյուրանոց» սահմանափակ պատասխանատվությամբ ընկերության տնօրեն Ելենա Ռեշետովան, նրա տեղակալ Վադիմ Վինոգրադովը, ինչպես նաեւ հրահանգիչներ Ռեգինա Իվանովան եւ Լյուդմիլա Վասիլեւան:

Հետաքննության նախնական տվյալներով՝ հունիսի 18-ին «Սյամոզերո» բնայգի-հյուրանոց» մանկական առողջարարական ճամբարի մասնակիցները հանրապետության Պրյաժայի շրջանի Սյամոզերո լճում մակույկներով հայտնվել են ալեկոծության մեջ: Երեք մակույկներում եղել են 47 երեխաներ եւ չորս չափահաս հրահանգիչներ: Փոթորկից մակույկները շրջվել են եւ ջրասույզ եղել:

Դրա հետեւանքով 13 երեխա զոհվել Է: 14-րդ երեխայի որոնումները շարունակվում են: ՌԴ-ի Քննչական կոմիտեն հարուցել Է քրեական գործ դպրոցականների մահվան փաստով: Կարելիայում եւ Մոսկվայում սուգ Է հայտարարվել զոհվածների հիշատակին, հաղորդել Է ՏԱՍՍ-ը: