Պետդեպարտամենտի աշխատակիցներն Օբամային առաջարկել են գրոհել Ասադի ուժերի վրա

ԱՄՆ-ի Պետդեպարտամենտի աշխատակիցները նամակ են ուղարկել նախագահ Բարաք Օբամային, որում նրան առաջարկել են ռազմական գործողություն իրականացնել Սիրիայի կառավարական ուժերի դեմ եւ պետական հեղաշրջման հասնել մերձավորարեւելյան երկրում: Այդ մասին հունիսի 16-ին հայտնել է The Wall Street Journal ամերիկյան թերթի էլեկտրոնային տարբերակը:

«Պետդեպի տասնյակ աշխատակիցներ այս շաբաթ բողոք են հայտնել Սիրիայում ԱՄՆ-ի քաղաքականության դեմ, նրանք ստորագրել են ներքին փաստաթուղթ, որը կոչ է բովանդակում՝ ուղղորդված ռազմական հարվածներ հասցնել Դամասկոսի կառավարությանը: Դրանում ասված է, որ ռեժիմի փոխարինումը «Իսլամական պետությանը» հաղթելու միակ միջոցն է»,- գրում է հրատարակությունը:

Ուղերձում քննադատվում է ԱՄՆ-ի քաղաքականությունը Սիրիայում, մասնավորապես, հրաժարումը հակամարտության կողմերից որեւէ մեկին աջակցելուց: Փաստաթղթի հեղինակները նախազգուշացնում են, որ ԱՄՆ-ը կորցնում է պոտենցիալ դաշնակիցներին ԴԱԻՇ-ի դեմ պայքարում սիրիացի սուննիների շրջանում այն դեպքում, երբ Ասադի ռեժիմը, իրենց կարծիքով, շարունակում է ռմբակոծել եւ սովամահության մատնել «սուննիներին, որոնք կրոնական մեծամասնություն են կազմում Սիրիայում»:

Հրատարակությունը նշում է, որ ուղերձի պատճենը հայտնվել է թերթի լրագրողների տրամադրության տակ: Նրա աղբյուրների տվյալներով՝ փաստաթուղթն ստորագրել են ԱՄՆ-ի արտաքին քաղաքական գերատեսչության 51 աշխատակիցներ, այդ թվում՝ հանգուցային պաշտոններ զբաղեցնող չինովնիկներ:

Պետդեպարտամենտի ներկայացուցիչն ընդունել է նման հուշագրի ստանալու փաստը, բայց հրաժարվել է մեկնաբանել դրա բովանդակությունը, հաղորդել է ՏԱՍՍ-ը: