Մոդրիչի հիասքանչ գոլը հաղթանակ պարգևեց Խորվաթիային Թուրքիայի դեմ խաղում

Եվրոպայի 2016 թվականի առաջնության D խմբի առաջին տուրում մրցում էին Թուրքիայի և Խորվաթիայի հավաքականները:

Գրեթե հավասար պայքարում ընթացած 1-ին խաղակեսում շատ էին ընդհարումները:

Առաջին խաղակեսի կարևորագույն պահը եղավ խաղավերջում. 41-րդ րոպեին հեռու տարածությունից Լուկա Մոդրիչի ֆանտաստիկ հարվածն անկասելի էր:

Երկրորդ խաղակեսի մեկնարկում՝ 52-րդ րոպեին խորվաթների ավագ Դարիո Սրնան շատ մոտ էր հաշիվը կրկնապակելուն. 20 մետր հեռավորությունից Սրնայի իրացրած տուգանայինից հետո գնդակը դիպավ հորիզոնական դարպասաձողին: 2 րոպե անց Սրնան կրկին մոտ էր գոլ խփելուն, սակայն հիանալի դիրքից շեղ հարվածեց:

Երկրորդ խաղակեսում Խորվաթիայի ազգային թիմի ֆուտբոլիստները բավականին մեծ առավելությամբ գործեցին:

72-րդ րոպեին գնդակը կրկին ետ մղվեց Բաբաջանի պաշտպանած դարպասի հորիզոնական ձողից. այս անգամ էլ Պերիշիչի գլխով հարվածից հետո դարպասաձողն օգնության հասավ թուրքերին:

Մնացած ժամանակահատվածում էլ բավականին վտանգավոր պահեր կային, սակայն հաշիվը մնաց անփոփոխ:

Այսպիսով, Խորվաթիայի հավաքականը հաղթեց նվազագույն հաշվով:

Խմբի մյուս խաղում կմրցեն Իսպանիան և Չեխիան:

Թուրքիա - Խորվաթիա՝ 0:1
գոլը՝ Մոդրիչ (41)