Ֆուտբոլավազք դեպի տիտղոս. Ալբանիա-Շվեյցարիա

  «Եվրո 2016»-ի շրջանակներում «Արմենպրես»-ը շարունակում է անդրադարձ կատարել Եվրոպայի առաջնության մասնակից հավաքականների պատմություններին, ֆուտբոլային հաջողություններին և տվյալ օրը կայանալիք հանդիպումների վիճակագրությանը: Ալբանիա-Ռումինիա հանդիպումը կսկսվի Երևանի ժամանակով 17:00-ին: 

Ալբանիայի ազգային հավաքական.Ալբանիայի ընտրանին Եվրո 2016-ի հինգ նորեկ հավաքականներից մեկն է: Ալբանիայի ֆուտբոլի ֆեդերացիան ՖԻՖԱ-ի անդամ դարձավ 1932-ին,  ՈՒԵՖԱ-ի անդամ՝ 1954-ին:

Միակ հաջողությունը, թերևս, 1964 թվականի Եվրոյի որակավորման փուլն էր, որտեղ Ալբանիան տեղ զբաղեցրեց Եվրոպայի լավագույն 16 թիմերի շարքում: Նախնական փուլում ալբանացիներին բաժին հասավ Հունաստանի հավաքականը: Վերջինս պարզապես հրաժարվեց մասնակցությունից, իսկ Ալբանիան  հայտնվեց հաջորդ փուլում, որտեղ նրա  մրցակիցը Դանիայի ընտրանին էր: 1/8 եզրափակիչ առաջին հանդիպմանը Ալբանիան 4 անպատասխան գնդակ ընդունեց դանիացիներից, սեփական հարկի տակ տանելով սփոփիչ հաղթանակ` 1:0 հաշվով:

Ալբանացիները քաղաքական դրդապատճառներից ելնելով,  բաց են թողել  1970 թվականի աշխարհի առաջնության, 1972-ի ու 1976-ի  Եվրոպայի, ապա 1978 թվականի աշխարհի ու վերջապես, 1980 թվականի Եվրոպայի առաջնության որակավորման փուլերը: 
Հետագայում մասնակցելով ընտրական հանդիպումների՝ Ալբանացիներին այդպես էլ չի հաջողվել լավ արդյունք գրանցել:

Շվեյցարիա ազգային հավաքական. Շվեյցարական ֆուտբոլն, իհարկե, Եվրոպական  առաջատարների շարքում երբեք չի եղել: 1880-ականներից Շվեյցարիայում սկսեցին ստեղծվել առաջին ֆուտբոլային ակումբները, իսկ հավաքականը արդեն  1905 թվականին իր առաջին ընկերական խաղն անցկացրեց Ֆրանսիայի ազգային ընտրանու հետ:
Երկրորդ աշխարհամարտից հետո շվեյցարացիները մասնակցեցին 1950 թվականի Մունդիալին, ապա ընդունելով հաջորդ՝ 5-րդ Մունդիալը, հասան մինչև քառորդ եզրափակիչ: Սակայն Եվրոպական մրցասպարեզներում Շվեյցարիայի բախտը չէր բերում: Եվրո 96-ի որակավորման փուլի խմբային մրցաշարում գրավելով առաջին հորիզոնականը՝ շվեյցարացիները կարծես կոտրեցին Եվրոպայում անհաջողությունների սառույցը և դարձան եվրոպայի առաջնության մասնակից: Նրանց բաժին հասավ նաև բացման հանդիպումը, որտեղ առաջնությունն ընդունող Անգլիայի ընտրանու դեմ խաղն ավարտեցին ոչ ոքի արդյունքով` 1:1: Հետագայում նրանք միավորներ չվաստակեցին՝ կրելով պարտություններ թե Նիդերլանդներից, թե Շոտլանդիայից: 
Եվրո 2008-ը անցկացվելու էր Ավստրայում և Շվեյցարիայում: Շատերն ակնկալում էին, որ գոնե այս անգամ, սեփական հարկի տակ նրանք ավելի հաջողակ կգտնվեն: Բայց այդպես չէին մտածում շվեյցարացիների հետո նույն խմբում հայտնված Թուրքիայի, Չեխիայի և Պորտուգալիայի ընտրանիները: Արդյունքում կրկին ձախողում:

Ալբանիա – Շվեյցարիա. Շվեյցարիայի հավաքականի կազմում հաճախ են ընդգրկվում արմատներով ալբանացի ֆուտբոլիստներ: Հենց Շվեյցարիայում են հանգրվանել հազարավոր էթնիկ ալբանացիներ Հարավսլավական պատերազմի տարիներին: Նրանցից ոմանք վերջին շրջանում պարբերաբար  շվեյցարացիների  հիմնական կազմ են հայտնվում,  օրինակ՝ Վալոն Բեհրամին, Ջերդան Շաքիրին, Փայթիմ Քասամին, Ադմիր Մեհմեդին:

Ալբանիան ու Շվեյցարիան միմյանց հետ հանդիպել են վեց անգամ, որոնցից հինգում հաղթանակ են տարել շվեյցարացիները: Միայն մեկ անգամ, 2004 թվականի Եվրոպայի առաջնության ընտրական փուլի հանդիպումներից մեկն ավարտվել է ոչ ոքի` 1:1: 
Հավաքականները միմյանց հետ առաջին անգամ հանդիպել են 1966 թվականի Աշխարհի առաջնության որակավորման փուլի շրջանակներում: Տիրանայում շվեյցարացիները հաղթեցին 2:0 հաշվով: Թիմերը միմյանց հետ նույն խմբում են հայտնվել նաև Մունդիալ 2014-ի ընտրական փուլում: Այստեղ էլ երկու խաղերում հաջողությունն ուղեկցել է Շվեյցարիային՝ 2:0 եւ 2:1: