Ստամբուլի ահաբեկչությունը ստանձնել է «Քրդստանի ազատության բազեներ» կազմակերպությունը

Ստամբուլի մետրոյի Վեզնեջիլեր կայարանում հունիսի 7-ին տեղի ունեցած պայթյունի պատախանատվությունը ստանձնել է Քրդական բանվորական կուսակցության (PKK) քաղաքային թևը համարվող «Քրդստանի ազատության բազեներ» (TAK) կազմակերպությունը: Այս մասին տեղեկացնում է թուրքական «Միլլիեթ» պարբերականը:

Նշվում է, որ TAK-ը պատասխանատվությունն իր վրա է վերցրել համացանցում արած հայտարարության միջոցով:

Հունիսի 7-ի առավոտյան պայթյուն էր որոտացել Ստամբուլի մետրոյի Վեզիջիլեր կայարանի մոտակայքում: Ըստնախնական տվյալների` ոստիկանական մեքենայի անցնելու ժամանակ հեռակառավարման միջոցով պայթեցվել էրկայանած մեքենան: Ավելի ուշ հաղորդվեց, որ պայթյունը մահապարտ ահաբեկչի գործն է:

Պայթյունի հետևանքով մահացել է 11 մարդ` 7 ոստիկան և 4 քաղաքացիական անձ:  36 մարդ վիրավոր է, ընդ որում,նրանցից 3-ի վիճակը ծանր է: Վնասվել են հարակից շինություններն ու ավտոմեքենաները:

«Քրդստանի ազատության բազեներ» կազմակերպությունը ավելի վաղ ստանձնել էր նաև Թուրքիայի մայրաքաղաք Անկարայում փետրվարի 17-ի երեկոյան տեղի ունեցած ահաբեկչության պատասխանատվությունը: Այդ ահաբեկչության հետևանքով զոհերի թիվը հասել էր 29-ի, վիրավորների թիվը 61-ն էր: Պայթյունը տեղի էր ունեցել Թուրքիայի զինված ուժերի գլխավոր շտաբից, ցամաքային, ծովային և օդային ուժերի հրամանատարության նստավայրերից, մեջլիսից, կառավարության կենտրոնական շենքից և ներքին գործերի նախարարությունից 200 մետր հեռավորության վրա: Զինվորական անձնակազմին տեղափոխող ավտոբուսը կարմիր լույսի տակ կանգնած էր եղել, երբ մեկ այլ ականապատված մեքենա պայթել էր այդ վայրում:

TAK-ը կապված է Քրդական բանվորական կուսակցության (PKK) հետ, սակայն խմբավորումն աչքի է ընկնում իր ինքնուրույնությամբ և անկախությամբ: Կազմակերպությունն ԱՄՆ-ի կողմից ներառված էահաբեկչական խմբավորումների ցուցակի մեջ: