Որևէ մարդու կամ որևէ երկրի միակ «սահմանափակումը» մեր գլխի, մեր մտածողության մեջ է .«Առավոտ»

Ներկայացնում ենք թերթի խմբագրականից մի հատված.

«Երկու օր առաջ տեղի ունեցավ հայկական սմարթֆոնների շնորհանդեսը։ Միջոցառումը համեստ էր կազմակերպված՝ ոչ ոք չէր ասում, որ դա ինչ-որ հեղափոխություն է ոլորտում։ Բայց նպատակը, որ Հայաստանում հավաքված հեռախոսներն ու պլանշետները մրցունակ լինեն մեր և ինչու չէ՝ այլ երկրների շուկաներում, պետք է միայն ողջունել և ավելին ՝ ցանկալի է դրան նպաստել։ Որովհետև դա շաքարի կամ բենզինի ներկրում չէ, ոչ էլ նույնիսկ՝ հանքարդյունաբերություն։ Դա գիտելիքի վրա հիմնված բիզնես է, որը, վստահ եմ, պատշաճ ուշադրության դեպքում կարող է հզորացնել մեր  երկիրը։

Բայց տեսնենք, թե ինչպես է այդ իրադարձությանն արձագանքել մեր հասարակության մի մասը։ Եթե դատենք «Ֆեյսբուքյան փնթփնթանների» գնահատականներով, ապա կարելի է ասել, որ այդ մասը ծաղրում է, հեգնում է և փնովում մեր հայրենակիցների նախաձեռնությունը։ Տրամաբանությունը մոտավորապես նույնն է, որով առաջնորդվում է Գիտությունների ակադեմիայի նախագահը՝ «էս քոսոտ երկրում հնարավոր չէ սմարթֆոն հավաքել»։ Հետաքրքիր է, չնայած «հավերժ աբիժնիկները» խարազանում են նաև Ռադիկ Մարտիրոսյանին, սակայն նրանք բոլորը նույն կարծրատիպերի և նույն նախապաշարումների գերին են։ Իրականում ես վստահ եմ, որ որևէ մարդու կամ որևէ երկրի միակ «սահմանափակումը» մեր գլխի, մեր մտածողության մեջ է, այլապես ամեն ինչ հնարավոր է»,–գրում է թերթի խմբագիրը։

Ամբողջությամբ՝ թերթի այսօրվա համարում։