Բազմաթիվ ՓՄՁ-ներ կփակվեն «Շրջանառության հարկի մասին» օրենքի կիրառումից հետո. ձեռնարկատերերի դժգոհությունները

Ինչպես հայտնում է Past.am-ը, մի շարք փոքր ու միջին ձեռնարկատերեր այս հինգշաբթի ՝ ժամը 10.30-ին պատրաստվում են բողոքի ակցիա անցկացնել ՀՀ կառավարության դիմաց: Նրանք պնդում են, որ «Շրջանառության հարկի մասին» օրենքի կիրառումից հետո փոքր և միջին ձեռնարկությունները հայտնվում են կոլապսի մեջ:

Ըստ հուլիսի 1-ից ուժի մեջ մտած «Շրջանառության հարկի մասին» օրենքի՝ այդ հարկի շեմը դառնում է 115 մլն դրամ, իսկ առևտրական գործունեություն իրականացնողների համար անվանական դրույքաչափը դառնում է 5%:

ՓՄՁ ոլորտի ներկայացուցիչ Արսեն Արզանյանը լավատես չէ և կարծում է, որ առաջիկայում բազմաթիվ ՓՄՁ-ներ կփակվեն: «5 տոկոս հարկը ՓՄՁ-ների համար մեծ գումար է: Երբ երեք ամիս հետո սկսվեն վճարումները, այդ ժամանակ արդեն կհասկանանք, թե ինչ վիճակում ենք հայտնվել»,- այսօր լրագրողներին ասել է նա: Արզանյանը նշել է, որ ձեռնարկատերերի կողմից առաջարկ է եղել, որպեսզի 5 տոկոս հարկը դառնա 3.5 տոկոս:

Ասուլիսի մեկ այլ բանախոս՝ Սևան Աղաջանյանն ասաց, որ նախաձեռնող խումբը հանդիպումներ է ունեցել բազմաթիվ մանր ու միջին գործարարների հետ: «Բողոքի ակցիայի ժամանակ մենք նամակ կհանձնենք վարչապետին»,-եզրափակեց Աղաջանյանը:

Լևոն Փանոսյան