Life.panorama.am-ը գրում է.
Այսօր առավոտյան 08:15 րոպեին ծնվել է դերասան ամուսիններ Դավիթ Հակոբյանի եւ Նոնա Թելոյանի առաջնեկը, այդ ժամից սկսած ինչպես Դավիթն է ասում` փոխվել են իր կյանքի գույներն ու իմաստը:
Առաջին անգամ հայր դառնալու իր հույզերով ու զգացողություններով Life.panorama.am-ի հետ կիսվել է նորաթուխ հայրիկը.
«Հույզերս խեղդում էին, երբ սպասում էի տղայիս ծննդին, իսկ առաջին հանդիպումն ուղղակի ֆանտաստիկ էր: Պատկերացրեք` գրեթե 15 րոպե ուղղակի հայացքով շփվում էի նրա հետ, իսկ առաջին գրկախառնությունն ու թաթիկների համբույրը կյանքումս երբեք չեմ մոռանա: Սա մի նոր սկիզբ է, կյանքի նոր էտապ, որը նկարագրելը գրեթե անհնար է, միայն ցանկությունս կհայտնեմ, որ բոլորն արժանանան այս պարգեւին, քանի որ սա ապրելու եւ արարելու նոր հույս է տալիս, ավելի ուժեղ ու նպտակասլաց ես դառնում»,- նշեց Դավիթն ու պատմեց.
«Որդիս ծնվել է 3.4 կգ քաշով եւ 51սմ հասակով, ասեմ, որ շատ գեղեցիկ տղա է: Ճիշտ է աչքերի գույնը դեռ չի երեւում, բայց կարծում եմ, տղաս ինձ չի դավաճանի եւ ինքն էլ կանաչաչյա կլինի, ինչպես երազում էր Նոնան»:
Դավիթի ու Նոնայի որդին կկրի պապիկի անունը, այս հարցում զույգը հատուկ պայմանավորվածություն ունի.
«Նոնան ցանկանում էր, որ մեր տղան կրի իմ անունը, բայց հետո որոշեցինք, որ իմ անունը ապագայում կկրի մեր թոռնիկը: Տղայիս հորս անունով ենք կոչել՝ Էդուարդ: Ասեմ, որ ես ու Նոնան միասին ենք եկել այս որոշմանը, թեպետ առաջարկն իմն էր, քանի որ հայրս լավ ու հաջողակ մարդ է: Բայց նաեւ խոստացել եմ Նոնային, որ երկրորդ բալիկի անունը միայն ինքը կորոշի: Ի դեպ՝ նշեմ, որ ծնողներիս ուրախությունը եւս աննկարագրելի էր, երբ իմացան առաջին թոռնիկի ծննդի մասին»,- պատմեց դերասանը:
Այսօր Դավիթը ընկերների եւ հարազատների հետ միասին հայկական ընտանիքներում ընդունված ավանդական խնջույք կկազմակերպի.
«Այսօր մեր տանը մի լավ խնջույք կկազմակերպենք ու կնշենք փոքրիկիս ծնունդը, իսկ արդեն ուշ երեկոյան ընկերներով կշարունակենք նշել մեր սիրելի փաբում, ուր եւ երեկ էինք անցկացնում, երբ պետք է ծնվեր տղաս»,- նկատեց նա:
Դավիթի փոխանցմամբ՝ Նոնան բալիկին լույս աշխարհ է բերել կեսարյան հատման միջոցով, այդ իսկ պատճառով էլ նրանք մի փոքր ուշ դուրս կգրվեն հիվանդանոցից: Նորաթուխ հայրիկը հայտնեց նաեւ, որ դուրս գրման օրը Նոնային ու որդուն անակնկալ է սպասվում.
«Մինչ տղայիս ծնունդը մենք ամեն ինչ գնել ու նախապես պատրաստել էինք, միայն Նոնայի ուզած կաթի շիշը չէի կարողանում գտնել, որն այսօր առավոտյան վերջապես գտա: Այնպես որ, ամեն ինչ պատրաստ սպասում ենք նոր կյանքի ընթացքին»,- ավարտեց Դավիթ Հակոբյանը:
