Դրամահավաք «Ո´չ թալանին» նախաձեռնության անունից

Այսօր «Ո´չ թալանին» նախաձեռնությունը տեղեկատվություն է տարածել այն մասին, որ որոշ անձինք իրենց անունից դրամահավաք են իրականացնում:

Հայտարարության մեջ մասնավորապես ասվում է.«Վերջերս տեղեկություններ են տարածվել, որ էլեկտրաէներգիայի սակագնի բարձրացման դեմ պայքարի համար մայրաքաղաքում որոշ մարդիկ գումար են հավաքում «Ո´չ թալանին» նախաձեռնության անունից։

«Ո´չ թալանին» նախաձեռնությունը պաշտոնապես հայտարարում է, որ որևէ առնչություն չունի այդ անձանց գործունեության հետ և որևէ մեկից գումար չի հավաքում էլեկտրաէներգիայի սակագնի բարձրացման դեմ պայքարելու համար։ Քաղաքացիներին խնդրում և հորդորում ենք առավել զգոն և ուշադիր լինել և նման դեպքերի կրկնության դեպքում անպայման տեղեկացնել նախաձեռնող խմբին»։

Այս կապակցությամբ զրուցեցինք խմբի անդամ Միհրան Ավագյանի հետ, ով մանրամասներ ներկայացրեց հրապարակած տեղեկատվությունից: Վերջինս տեղեկացրեց, որ գումարը հավաքվում է Երևանի կենտրոնում:

«Փողոցում տարբեր մարդիկ տեսել են ու մեզ տեղեկացրել, որ մեր անունից փող են հավաքում: Բայց մենք բացարձակ տեղեկություն չունենք՝ ովքեր են ու ինչի համար են հավաքում: Տոնավաճառներից մեկում ևս տեսել են նրանց»,- ասաց վերջինս:

Հարցին, թե իրենք նախկինում դրամահավաք կազմակերպե՞լ են, Միհրանը պատասխանեց, որ փողոցում դրամահավաք չեն իրականացրել՝ միայն նստացույցի ժամանակ է եղել բոլորի աչքի առաջ:

Արուսիկ Տիգրանյան