«Վերջին հայրիկն» ավարտվում է, իսկ «Աբելի քույրը»՝ փոփոխության ենթարկվում. Մանրամասնում է ստեղծագործական կազմը

ATV հեռուստաընկերությունը մարտ ամսից հեռուստադիտողի դատին է հանձնել «Աբելի քույրը» հեռուստասերիալը: Ամիսներ առաջ Aysor.am-ի հետ զրույցում դերասան-երգիչ Արամոն խոստովանեց, որ ինքը ևս ներառված է դերասանական կազմում. մարմնավորելու է գլխավոր հերոսների՝ Աբելի և իր քույրիկի հայրիկին:

Սակայն մինչ այսօր նկատելի է, որ Արամոն սերիալում ընդգրկված չէ:

«63-րդ սերիայում, որն էկրաններն կլինի չորեքշաբթի օրը,  Արամոյին կտեսնեք»,-տեղեկացրեց սցենարիստ Անահիտ Մխիթարյանը:

Նա ասաց, որ ի սկզբանե մտածված կերպարը փոփոխություններ է կրել: Պատճառն այն է, որ ֆիլմի ստեղծագործական կազմում փոփոխություններ են եղել. ռեժիսոր Գրիգոր Վահրամյանին այլևս փոխարինում է Ելենա Արշակյանը. «Բոլորս միասին համաձայնության եկանք ու նպատակահարմար գտանք, որ Արամոն այլ կերպարով պետք է ներկայանա: Փակագծերը չեմ բացի, շուտով ամեն ինչ պարզ կլինի»:

Ի դեպ, մեր զրուցակցից հետաքրքրվեցինք նաև շշուկների մասին, թե նոր նախագիծ է պատրաստվում:

«Դեռ նոր նախագիծ չունենք, քանի որ զբաղվածությունը քիչ չէ: Միայն ասեմ, որ «Վերջին հայրիկ» սերիալի (սցենարիստ՝ Ան. Մխիթարյան հեղ.) վերջին սերիան էկրանին կլինի երեքշաբթի օրը: Իսկ նոր աշխատանքով հանդես կգանք, հավանաբար, սեպտեմբեր ամսին»,-ընդգծեց Ա. Մխիթարյանը:

Հիշեցնենք, որ «Աբելի քույրը» սերիալի պրոդյուսերական աշխատանքն ի սկզբանե վստահված էր Հրաչ Մուրադյանին: Արդյոք նրա գործառույթներն այսուհետ իրականացնելու է նոր ռեժիսորը և, ընդհանրապես, ինչո՞վ է պայմանավորված ստեղծագործական կազմի փոփոխությունը,  Aysor.am-ը ճշտեց ATV հեռուստաընկերության ծրագրերի տնօրեն Հասմիկ Մանուկյանից:

«Ովքեր ուշադիր են եղել, նկատած կլինեն, որ յուրաքանչյուր նախագծում մենք հաճախ ենք փոփոխություններ անում թե՛ անձնակազմի, թե՛ սյուժետային առումով: Կարծում եմ՝ այդպես առավել լավ արդյունքներ ենք ունենում: Ինչ վերաբերում է պրոդյուսերին, ապա միայն կասեմ, որ հիմա Հրաչը քաղաքում չէ, բայց շարունակում է մնալ որպես պրոդյուսեր: Ելենա Արշակյանն էլ սերիալի ռեժիսորն է»:

Նոր նախագծի առումով էլ Հ. Մանուկյանը հաստատեց, որ նման աշխատանք կատարվում է, սակայն ինֆորմացիա տրամադրել դեռևս չեն կարող: «Դա թող մնա սեպտեմբերին… Բայց ասեմ, որ հունիսի 6-ից ամեն աշխատանքային օր՝ ժամը 09:00-ից 11:00-ը  ATV հեռուստաընկերությունը ևս կունենա առավոտյան ծրագիր»,- ասաց նա:

Այսօրվա տարածված ձևաչափին համահունչ՝ հաղորդավարները կլինեն դերասաններ՝ տղա և աղջիկ: