«Արցախ, իմ սեր» ներկայացման առաջնախաղը նվիրվում է ՀՀ անկախության 25-ամյակին

ՀՀ մշակույթի նախարարության աջակցությամբ՝ մայիսի 30-ին և 31-ին, ժամը 19:00-ին, Հ. Պարոնյանի անվան երաժշտական կոմեդիայի պետական թատրոնում տեղի կունենա Ա. Բարսեղյանի «Արցախ, իմ սեր» կամ «Պըլը Պուղի» երաժշտական կատակերգության առաջնախաղը՝ նվիրված ՀՀ անկախության 25-ամյակին: Այս մասին «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից:

Բեմադրությունը՝ Գայանե Բարսեղյանի (ԱՄՆ), դիրիժոր՝ Արեգ Առուստամյան, նկարիչ՝ Տաթև Հովհաննիսյան, ռեժիսորի ասիստենտ՝ ՀՀ վաստակավոր արտիստ Բորիս Պեպանյան, պարերը՝ ՀՀ մշակույթի վաստակավոր գործիչ Գագիկ Կարապետյանի, խմբավար՝ Շուշան Հովհաննիսյան, դերերում՝ Ավո Խալաթյան, Բորիս Պեպանյան, Սաթիկ Հախնազարյան, Մարիամ Գրիգորյան, Աշոտ Հակոբյան, Արթուր Կարապետյան, Վարուժան Մանուկյան, Արթուր Գեղամյան, Արմեն Գասպարյան և այլք: Թատրոնի գեղարվեստական ղեկավար՝ ՀՀ ժողովրդական արտիստ, ՀՀ պետական մրցանակի դափնեկիր Երվանդ Ղազանչյան:

Հ. Պարոնյանի անվան երաժշտական կոմեդիայի թատրոնն անդրադարձել է Արարատ Բարսեղյանի «Արցախ, իմ սեր» («Պըլը Պուղի») հերոսական կոմեդիային` նպատակ ունենալով ևս  մեկ անգամ հանրությանը հիշեցնել Արցախի պատմության, օտարերկրյա զավթիչների դեմ ժողովրդի պայքարի, նրա նիստուկացի, հումորի, երգ ու պարի, պատմական Մազրայի ու Շուշիի մասին: Դրամատուրգը՝ զվարճաբան Պըլը Պուղու միջոցով ներկայացնում է Ղարաբաղի քաղցր լեզուն, հայ մելիքներին, որոնք իրական պատմական կերպարներ են:

Այս ստեղծագործությունը մի հետադարձ հայացք է մեր պատմությանը, որտեղ միշտ հանդիպում ենք հայի պայքարի ոգուն ու միասնականությանը: