Մասնագետի խորհուրդները. էպիլյատորի ճիշտ օգտագործում

Առանց անցանկալի մազերի հարթ մաշկն ամռանը նախապաստվելու պայմաններից մեկն է: Իհարկե, մարմնի անցանկալի մազերից ազատվելու բազմաթիվ միջոցներ կան, սակայն այս անգամ NEWS.am STYLE-ին հետաքրքրեց մարդկության ամենամեծ գյուտերից մեկը՝ էպիլյատորը, ինչը հնարավորություն է տալիս մի քանի ամիս նույնիսկ չհիշել, որ ինչ-որ տեղ ավելորդ մազեր կան: Կա՞ն, արդյոք, հատուկ կանոններ, որոնց պետք է հետեւել: Այս հարցով դիմեցինք կոսմետոլոգ Մարինե Հովասափյանին:

«Եթե առաջին անգամ եք որոշել մազահեռացման համար էպիլյատոր օգտագործել, փորձեք հետեւել այս ոչ դժվար, բայց կարեւոր կանոններին:

Էպիլյատորի արագ պտտվող մեխանիզմը կառուցված է այնպես, որ կարողանա ամուր բռնել եւ հեռացնել անպետք մազիկները: Այդ պատճառով մինչեւ մազահեռացումը սպասեք, որ մազերը մի քանի միլիմետր աճեն: Որքա՞ն պետք է լինի դրանց ճիշտ երկարությունը՝ կարելի է հասկանալ գործողության ընթացքում ձեռք բերած փորձով. եթե մազը շատ կարճ լինի, էպիլյատորն այն պարզապես չի կարողանա բռնել:

Էպիլյատորի պտտվող մեխանիզմի արագությունը կարելի է կարգավորել. նրանց, ովքեր առաջին անգամ են այն գործածելու, խորհուրդ է տրվում նվազագույն արագությունը սահմանել: Շատ մեծ արագության հետեւանքով բարակ մազիկները չեն հեռացվի, այլ հիմքի մոտ կբեկվեն: Այդ դեպքում հաջորդ օրն իսկ ցցված մազերը երաշխավորված են:

Մազահեռացումից առաջ ցանկալի է տաք լոգանք ընդունել (15-20 րոպեն բավարար է): Ինչո՞ւ: Մաշկի մակերեսի ծակոտիները կլայնանան եւ մազահեռացման գործողությունն ավելի դյուրին եւ քիչ ցավագին կլինի: Այս խորհուրդը նորագույն մշակումներին չի վերաբերում: Ամենաժամանակակից մոդելները կարելի է գործածել նույնիսկ ջրի տակ: Օրինակ՝ հրաշալի տարբերակ է Braun-ի էպիլյատորների նոր շարքը. Braun Silk-épil 7 7681 Legs, Body & Face Wet&Dry, որոնք աշխատում են ջրի մեջ»:

Անկասկած, էպիլյատորն իրավամբ համարվում է մազահեռացման համար նախատեսված համեմատաբար արդյունավետ միջոցներից մեկը: Դրա միակ թերությունը, թերեւս, ցավագին զգացողություններն են: Բայց, պարզվում է, որ կարելի է ազատվել դրանցից: Ինչպե՞ս: