Թուրքիան սպառնացել է խզել բոլոր համաձայնագրերը ԵՄ հետ

Թուրքիան կարող է դադարեցնել իր, այդ թվում` մաքսային միությանը վերաբերող բոլոր համաձայնագրերը Եվրամիության հետ, եթե Բրյուսելը Անկարայի հետ բանակցություննմերում շարունակի երկակի ստանդարտների քաղաքականությունը:

Այս մասին, ինչպես հաղորդում է «Արմենպրես»-ը` վկայակոչելով թուրքական TRT Haber հեռուստաալիքը, հայտարարել է Թուրքիայի նախագահի խորհրդական Յիղիթ Բուլութը:

Թուրքիան ԵՄ հետ մաքսային միության համաձայնագիրը ստորագրել է 1996 թվականին: Վերջերս Անկարան փորձում է իրեն ձեռնտու կերպ վերանայել այդ համաձայնագիրը:

2016 թվականի մարտի 18-ին Թուրքիա-ԵՄ գագաթաժողովում համաձայնություն  էր ձեռք բերվել, ըստ որի հուլիսի 1-ից Թուրքիայի քաղաքացիների համար Եվրոպա վիզային ռեժիմը պետք է վերացվի: Մայիսի 11-ին հայտնի էր դարձել, որ Եվրախորհրդարանը դադարեցրել է Թուրքիային ԵՄ հետ առանց վիզային ռեժիմ հատկացնելու վրա աշխատանքները: Փախստականների հետ կապված մարտի 18-ին կողմերը պայմանավորվել էին այն մասին, որ բոլոր անլեգալ միգրանտները, որոնք Հունաստան են անցել Թուրքիայի տարածքով, պետք է հետ ուղարկվեն Թուրքիա, որը դրա փոխարեն պետք է Բրյուսելից լրացուցիչ ստանա 3 մլրդ եվր ո ֆինանսավորում:

EUobserver-ն ավելի վաղ հայտնել էր, որ կողմերը միգրանտների վերադարձման ծրագիրը համաձայնեցրել են ընդհանուր գծերով, բայց չեն կարողացել համաձայնվել գործարքի իրավական կարգավիճակի, այն սկսվելու ժամկետի, 3 մլրդ եվրո լրացուցիչ ֆինանսավորում հատկացվելու եւ Թուրքիայի` ԵՄ անդամակցության բանակցությունները վերսկսելու հարցերում: Այդ բանակցությունները Ֆրանսիայի նախաձեռնությամբ դադարեցվել էին դեռեւս 2007 թվականին:

Թուրքիայի նախագահ Թայիփ Էրդողանը ապրիլին սպառնացել էր ԵՄ-ին հրաժարվել միգրանտների գծով գործարքից այն դեպքում, եթե Բրյուսելը հրաժարվի կատարել Թուրքիայի մասով իր ստանձնած պարտավորությունները: