Ով է Ռուբեն Վարդանյանի տաղանդավոր քույրը. լուսանկարներ, տեսանյութ

Wnews.am-ը շարունակում է ներկայացնել հայ տաղանդավոր եւ հեղինակավոր կանանց։ Այս անգամ ներկայացնում ենք երգահան Մարինե Ալեսին, ով հայ բարերար, գործարար Ռուբեն Վարդանյանի քույրն է։

Մարինե Վարդանյան-Համբարձումյանը ծնվել է 1958թ. նոյեմբերի 24-ին, Մոսկվայում: Ներկայանում է «Ալես» ստեղծագործական կեղծանունով՝ զավակների՝ Ալեքսանդրի և Սեդայի անունների հապավումից:

1975-79թթ սովորել է Երևանի Ռ.Մելիքյանի անվան երաժշտական ուսումնարանի դաշնամուրային բաժնում: 1979-82թթ աշխատել է Երևանի Ա.Այվազյանի անվան երաժշտական դպրոցում` որպես մանկավարժ: 1982-87 թթ սովորել է Երևանի գեղարվեստաթատերական ինստիտուտի թատերագիտական բաժնում, որտեղ ստացել է Վահրամ Փափազյանի անվան կրթաթոշակ:

1987թ-ից ուսումը շարունակել է Մոսկվայի Թատերական արվեստի պետական ինստիտուտում, որին զուգահեռ սովորել է նաև ՀՀ ԳԱԱ արվեստի ինստիտուտում:

1987-98թթ դասավանդել է Երևանի գեղարվեստաթատերական ինստիտուտի արվեստի տեսության և պատմության ամբիոնում: Աշխատանքի բերումով 1993թ-ից մեկնել է ԱՄՆ: 1998-2008թթ աշխատել է Վաշինգթոնում և Մոսկվայում` որպես արվեստի խորհրդատու:

«Ես  Երեւանից շատ եմ բացակայել, բայց երբ հեռու ես գնում հայրենիքի զգացողությունը եւ վերաբերմունքը դեպի հայրենիքը, անկախ նրանից աշխատանքի բերումով ես գնացել, թե ներքին որոշումով, վերափոխվում է»,- ասում է Մարինե Ալեսը։

Հեղինակել է շուրջ 300 հայերեն և ռուսերեն երգեր, որոնցից մոտ 60-ը տեղ են գտել նրա թողարկած թվով 5 սկավառակներում` «Կհեռանամ ինձանից» (1999թ.), «Իմ բարդիներ» (2001թ.), «Մտորումներ» (2003թ.), «Քո կողքին և առանց քեզ» (2007թ.), «Ոտաբոբիկ` երկնքով» (2010թ.):

Մարինե Ալեսը գրում է իր բոլոր երգերի խոսքերը, որոնք կատարում են Հայաստանի երգարվեստի լավագույն ներկայացուցիչները: Ունի 12 սինգլ` «Քարե անձրև», «Պատրանքի թևով», «Постойте, господа», «Դարի զավակներ» և այլն:

Վերջինիս համար արժանացել է Սայաթ-Նովայի համահայկական մրցույթ-փառատոնի գլխավոր մրցանակի: 1989թ-ից Հայաստանի թատերական գործիչների միության անդամ է: 2008թ. վերադարձել և հաստատվել է Երևանում: 2009թ. եղել է «Նվիրիր կյանք» բարեգործական հիմնադրամի հիմնադիրներից, որի պատվավոր նախագահն է ՀՀ առաջին տիկին Ռիտա Սարգսյանը:

Արժանացել է մի շարք մրցանակների և պատվոգրերի, որոնցից են` Վաշինգթոնում հայ-ամերիկյան ասամբլեայի և Մոսկվայի «Արմենիա» պրոդյուսերական ընկերության կողմից ստացած մրցանակները` հայկական արվեստում ունեցած ավանդի համար: 2010թ. թողարկել է «Բեկորներ» բանաստեղծությունների ժողովածուն:

Մարինե եւ Ռուբեն Վարդանյանների ծնողները

Մարինե Ալեսը ամուսնացել է երկու անգամ։

«Ես այժմ ունեմ իմ երկրորդ ընտանիքը։ Առաջին ամուսինս մնացել է որպես երեխաներիս հայր, չէ որ հայրն ու մայրը լինում են միակը։ Հարազատներս ինձ տվեցին երջանիկ լինելու կամ ինքդ քեզ հետ ավելի ազնիվ լինելու իրավունքը եւ ես հիմա ապրում եմ այդ տեսակի մեջ, որտեղ  կան երեխաներս, հարազատներս եւ իմ այսօրվա ընտանիքը»,- պատմում է Մարինե Ալեսը։

 

«Երբ դեռ փոքր էի, հայրիկս նվագարկիչը միացնում էր ու ասում՝ լսի, թե ձայնն ինչ որակ կարող է ունենալ. եթե ես չունենայի հայր, ով ինձ կարող էր ցույց տալ այդ ճանապարհը, ես փոքր ժամանակ ինչ գիտեի ձայնը ինչ է, որակը ինչ է…ձայնի նկատմամբ զգացողությունս գալիս է հորս շնորհիվ»,- պատմում է երգահանը։

 

Վերջերս տեղի ունեցավ Մարինե Ալեսի «Ձեզանից մեկը….» խորագրով համերգաշարը, որի նպատակը մշակույթի միջոցով երկխոսության կամուրջ ստեղծելն է Հայոց ցեղասպանությունը վերապրածների ժառանգների միջեւ:

Համերգները կայացան Գյումրիում, Թբիլիսիում եւ Սանկտ Պետերբուրգում:
Թբիլիսիի համերգին ներկա էին նաեւ ՀՀ նախագահն ու առաջին տիկին Ռիտա Սարգսյանը։

Տաղանդավոր երգահանը կազմակերպում է նաեւ բարեգործական համերգներ, որոնց հասույթն ուղղվում է «Նվիրիր կյանք» հիմնադրամին, որի հիմնադիրներից է նաեւ ինքը։

«Բարեգործություն մի անգամ գումար տալը չէ։ Բարեգործությունը պետք է:Մինչեւ քեզ նեղություն չտաս, ուրիշին լավություն չես տա։ Բարեգործություն անելիս պետք է լինես շատ զգույշ, չվիրավորվես, ում օգնում ես, այդ աջակցությամբ։ Այսինքն՝ քո հանդեպ պետք է ազնիվ լինես, կարիք ունեցողի հանդեպ` զգույշ»,- ասում է երգահանը։