Ցանկացած վատ գործ կատարող, չեմ կարծում, որ ինքնամոռաց որոշի այլ կերպ մտածել. տնտեսագետը՝ կոռուպցիայի դեմ պայքարի մասին

Past.am-ի հետ զրույցում տնտեսագետ Վարդան Բոստանջյանն անդրադարձավ վարչապետ Հովիկ Աբրահամյանի հայտարարությանը, կոռուպցիայի դեմ պայքարին և պետական ծախսերի կրճատմանն ուղղված քայլերին:

Ըստ նախկին պատգամավորի՝ վստահության պակաս կա, քանի որ այդ վիճակը եղել է տարիներ շարունակ, բայց վարչապետը խոսում է շատ խիստ: Բոստանջյանի խոսքով՝ Հովիկ Աբրահամյանը խոսեց ոչ թե քաղաքացիների համար, այլ նրա խոսքն ուղղված էր հենց չինովնիկներին:

«Սա զգուշացում է, որ պետք է նոր մոտեցում ունենաք»,- հավելեց պարոն Բոստանջյանը:

Վարդան Բոստանջյանն ասաց նաև, որ ցանկալի կիներ, որ գործնական քայլերն արագ իրականանային, բայց, նրա կարծիքով, անշնորհակալ գործ կլինի, եթե հիմա կանխատեսումներ արվեն: Տնտեսագետը խորհուրդ տվեց սպասել:

Հարցին՝ ապրիլյան պատերազմը դա՞ս եղավ որոշ չինովնիկների համար, մեր զրուցակիցը պատասխանեց. «Ցանկացած վատ գործ կատարող, չեմ կարծում, որ ինքնամոռաց որոշի այլ կերպ մտածել:Միևնույն է, համակարգը կոռուպցիոն է, այնպես չէ, որ նրանք սկսեցին հուզվել և խղճալ հասարակությանը:

Կոռուպցիոներներն իրենց համար են վախեցած: Ինչքան էլ նրանք մտածեն, որ վտանգից հեռու են, այդ վտանգն առկա է: Քառօրյա պատերազմը ցույց տվեց, որ մենք չափազանց խոցելի ենք: Վարչապետի բարձրաձայնումը, ըստ էության, խիստ զգուշացում էր կոռուպցիոն համակարգում գտնվողների համար»:

Լևոն Փանոսյան