Դավիթ Հարությունյանը չի բացառում ԸՕ նախագծի քննարկման համար ԱԺ արտահերթ նստաշրջան հրավիրելու հնարավորությունը

Հայաստանի Հանրապետության կառավարությունը շահագրգռված է, որպեսզի ՀՀ Ընտրական օրենսգրքի շուրջ լինի ավելի լայն կոնսոլիդացիա: Ազգային ժողովում ՀՀ Ընտրական օրենսգրքի նախագծի երկրորդ ընթերցմամբ քննարկման ժամանակ ՀՀ կառավարության աշխատակազմի ղեկավար-նախարար Դավիթ Հարությունյանը, անդրադառնալով Ընտրական օրենսգրքի շուրջ կոնսենսուսի հասնելու նպատակով արված առաջարկները քննարկելու համար ԱԺ արտահերթ նստաշրջան հրավիրելու՝  ՀԱԿ խմբակցության ղեկավար Լևոն Զուրաբյանի առաջարկին, չբացառեց, որ կառավարությունը Ընտրական օրենսգիրքը քննարկելու համար կհրավիրի արտահերթ նստաշրջան:

 «Ես չեմ համարում, որ այսօր,  երկրորդ ընթերցմամբ կամ հետագայում երրորդ ընթերցմամբ Ընտրական օրենսգրքի նախագիծը ներկայացնելով՝ մենք բացառում ենք  օրենսգրքի շուրջ հետագա աշխատանքները: Կոնսենսուսի պարագայում մենք կհրավիրենք Ազգային ժողովի արտահերթ նստաշրջան և կներկայացնենք այն առաջարկությոնւները, որոնց վերաբերյալ համաձայնության ենք եկել»,- «Արմենպրես»-ի հաղորդմամբ՝ նշեց Հարությունյանը:

Անդրադառնալով պատգամավորների դժգոհություններին, թե ՀՀ Ընտրական օրենսգրքի երկրորդ ընթերցմամբ քննարկումը խորհրդարանին է ներկայացվել է 24-ժամյա ռեժիմով, ինչը պատգամավորներին հնարավորություն չի տալիս ամբողջությամբ ներկայացնել իրենց առաջարկները՝ Դավիթ Հարությունյանն ասաց. «Եթե մենք պայմանավորվում ենք, որ Ընտրական օրենսգիրքը քննարկելու համար մինչև այս ամսվա վերջ արտահերթ նստաշրջան ենք հրավիրելու, մենք հարցը 24-ժամյա ռեժիմով չենք քննարկի, սակայն եթե չենք ունենալու  արտահերթ նստաշրջան, ես ստիպված կլինեմ հարցը ներկայացնել 24-ժա մյա ռեժիմով»:

Մինչ այդ Ընտրական օրենսգրքի շուրջ քննարկումներ կազմակերպելու համար արտահերթ նստաշրջան հրավիրելու առաջարկով հանդես էր եկել ՀԱԿ խմբակցության ղեկավար Լևոն Զուրաբյանը: Զուրաբյանն ընդգծել էր, որ հակառակ պարագայում իրենք դադարեցնելու են իրենց մասնակցությունը ԸՕ-ի երկրորդ ընթերցմամբ քննարկմանը: Ազգային ժողովը սկսել է ՀՀ Ընտրական օրենսգրքի նախագծի երկրորդ ընթերցմամբ քննարկումը: