Առողջ և գեղեցիկ ոտքեր. ինչպե՞ս ազատվել ոտքերի անոթային ցանցից և որո՞նք են վտանգները

Շատ կանայք բողոքում են ոտքերի խնդիրներից՝ մասնավորապես ոտքերի վրա առաջացած անոթային աստղիկներից կամ երակային ցանցից, որի արդյունքում ոտքերը ոչ էսթետիկ տեսք են ստանում:

Անոթային աստղիկներ

Մաշկի վրա երակների բարակ ցանցի առաջացումը, որը նման է աստղիկների, խոսում է ստորին վերջույթներում արյան հոսքի խանգարման մասին և պահանջում է մանրակրկիտ ուսումնասիրություն:

Սովորաբար դրանք հայտնվում են վարիկոզային հիվանդության վաղ փուլերում, երբ որոշ երակներում խանգարվում է արյան շրջանառությունը:

Նույնիսկ փոքրիկ անոթների ձգումն արդեն ահազանգ է, որ ոտքերում կա արյան շրջանառության խանգարում և խցանման երևույթներ: Սա կարող է առաջ բերել լուրջ բարդություններ՝ բորբոքում և երակների թրոմբոզ:

Ինչպե՞ս են առաջանում անոթային խնդիրները

Անոթային խնդիրների առաջացման առաջին պատճառը ժառանգականությունն է:  Անոթային աստղիկների առաջացման պատճառ կարող են լինել նաև հորմոնային ֆոնի խնդիրները: Այստեղ դեր ունի նաև ֆիզիկական ծանրաբեռնվածությունը՝ սպորտը, պրոֆեսիանալ պարերը, ծանրություն բարձրացնելը, ոտքերի վրա երկար կանգնելը: Արյան խցանման կամ դրանց երկարատև հոսքի պատճառով անոթները կարող են չդիմանալ ճնշմանը, ինչի հետևանքով անոթների պատերը լայնանում են և անցնում մաշկի տակ:

Ինչպե՞ս ազատվել երակային ցանցից

Նախ և առաջ պետք է այցելել անոթաբանի կամ ֆլեբոլոգի: Սովորաբար նշանակվում է մի քանի ընդհանուր պրոցեդուրա վարիկոզային հիվանդության բուժման կամ կանխարգելման համար, օրինակ, դեղամիջոցներ երակների պատերը ամրացնելու համար, մերսումներ, հատուկ ներքնազգեստ և զուգագուլպաներ, ինչպես նաև երակների  թերությունների վերացման վիրահատական և կոսմետոլոգիական միջամտություններ:

Սակայն արտաքին դրսևորումները բուժելը առանց հիվանդության ներքին պատճառները վերացնելու ճիշտ չէ և սպառնում է խնդրի կրկնությամբ: Այդ պատճառով ֆլեբելոգը նախ պետք է բուժի խոշոր թերություններն ու վարիկոզի բարդացումները, իսկ կոսմետոլոգը հիվանդության հիմնական բուժումից հետո  պայքարում է կոսմետիկ փոքր թերություններ դեմ՝ աստղիկներ, մանր երակներ:

---