Համանախագահները փորձել են տողատակով կամ դիվանագիտական միջոցով մեղադրել Ադրբեջանին ագրեսիայի մեջ. Թևան Պողոսյան

Երկուշաբթի՝ մայիսի 16-ին, Վիեննայում սպասվում է Հայաստանի և Ադրբեջանի նախագահների հանդիպումը: Ըստ շրջանառվող տեղեկությունների՝ հանդիպմանը կմասնակցեն ոչ միայն ԵԱՀԿ Մինսկի խմբի համանախագահները, այլև Ռուսաստանի և Ֆրանսիայի արտգործնախարարներն ու ԱՄՆ պետքարտուղարը:

ԱԺ արտաքին հարաբերությունների հանձնաժողովի անդամ Թևան Պողոսյանը Past.am-ի հետ զրույցում նշեց. «Մենք պետք է գիտակցենք, թե ինչին է նվիրված այս հանդիպումը: Քննարկվող հարցերը ձևակերպված են եղել նաև Հայաստանի կողմից, մասնավորապես՝ ռազմական գործողությունների անթույլատրելիության և հետաքննության մեխանիզմների ձևավորման հետ կապված: Ես նաև կարդացի, որ համանախագահների անունից նամակ են գրել Ադրբեջանին՝ ասելով, որ որևէ իմաստ կամ հնարավորություն Ադրբեջանը չի ունենալու, որպեսզի խուսափի 1994 թվականի եռակողմ զինադադարի պայմանագրից»:

Ըստ պարոն Պողոսյանի՝ համանախագահներն այսպես փորձել են տողատակով կամ դիվանագիտական միջոցով տեղեկացնել, որ մեղադրում են Ադրբեջանին ագրեսիայի մեջ:

«Այս ամենը մի կողմ դնելով՝ ասեմ, որ տեղի կունենա հանդիպում, որի ժամանակ կարող են քննարկվել այդ հետաքննման մեխանիզմները, վստահության բարձրացման հետ կապված հարցերը, բայց գիտակցենք, որ դժվար է սպասել որևէ հաջողության, եթե Արցախի կողմը չկա բանակցություններում:

Ադրբեջանն ուղղակի կգնա հանդիպմանը, կփորձի համոզել, որ հավատարիմ է գործընթացին, բայց չկա սպասելիք, որ ինքն այնտեղի հնարավոր պայմանավորվածություններին հավատարիմ կլինի, քանի որ մենք տեսել ենք նրանց վարքագիծը, հասկանում ենք՝ ով է մեր թշնամին:

Թշնամուն միակ զսպող ուժը մեր բանակի հզորությունն է:Նրանք պետք է գիտակցեն` մեր բանակն էլ չի սպասելու, որ նորից գործողություններ տեղի ունենան, այլ կարող է նախապատրաստման ժամանակ խափանել թշնամու ծրագրերը»,- ասաց պատգամավորը:

Լևոն Փանոսյան