«Կոկա-Կոլա»-ի 20-ամյա տարեդարձին ավազե անիմացիոն շոու է ցուցադրվել, ելույթ են ունեցել «Մալխաս» բենդն ու Վահագն Հայրապետյանը

Life.panorama.am-ը գրում է.

«Կոկա-Կոլա Հելլենիկ Բոթլինգ Քամփնի Արմենիա» Ընկերությունն օրերս նշել է Հայաստանում իր գործունեության 20-ամյակը: Այդ կապակցությամբ Ընկերությունը տոնական երեկո էր կազմակերպել, որին հրավիրված էին գործընկերներ, աշխատակիցներ, հաճախորդներ, դիվանագիտական առաքելությունների, գործադիրի, ՀԿ-ների ներկայացուցիչներ և այլ մասնաճյուղերի ղեկավարներ: «Կոկա-Կոլա Հելլենիկ Արմենիա» ընկերությունն աշխարհում ոչ ալկոհոլային զովացուցիչներ արտադրող խոշորագույն ընկերություններից մեկի մասնաճյուղն է, որը նաև Հայաստանում կոկա-կոլա ըմպելիքների միակ լիազորված շշալցնողն է: Մայիսի 10-ին կայացած միջոցառմանն ամփոփվեցին 20-ամյա գործունեության արդյունքներն ու նվաճումները:

Այս տարիների ընթացքում ընկերությունն ավելի քան 21.5 մլրդ դրամի ներդրում է արել՝ նպաստելով ՀՀ տնտեսության զարգացմանը: Ընկերությունում ավելի քան 300 մասնագետ է աշխատում, 11.000-ից ավելի կորպորատիվ հաճախորդներն էլ օգնում են արտադրանքն արագ հասցնել սպառողին: Ինչպես միջոցառման ընթացքում նշել է ընկերության գլխավոր տնօրեն Սայյորա Այուպովան, Ընկերության հարստությունն իրենց կադրերն են:

«Մենք աշխատանքի ենք վերցնում բուհերի շրջանավարտների, ուղարկում նրանց արտասահման` սովորելու ու լավագույն փորձը Հայաստան բերելու»:

Երեկոյի մեկնարկին զովացուցիչների ստեղծման պատմությունն ու հետագա զարգացումը ցուցադրող ավազե անիմացիոն շոու է ցուցադրվել: Դրան երաժշտական ծրագիր է հաջորդել, որի ընթացքում ելույթ են ունեցել երեկոյի հատուկ հյուրեր «Մալխաս» բենդն ու Վահագն Հայրապետյանը:

Միջոցառման հյուրերից էր նաև «Կոկա-Կոլա Հելլենիկ» ընկերության տարածաշրջանային տնօրեն Քիթ Սանդերսը, որը, անդրադառնալով Խմբում «Կոկա-Կոլա Հելլենիկ Արմենիա»-ի գործունեությանը, նշել է Ընկերության՝ ընտանիքի կարևոր անդամ լինելը:

«Հայաստանյան մեր թիմի մասնագետների շնորհիվ` երկու տասնամյակ գործող Ընկերության արտադրած ըմպելիքներն առանձնանում են միջազգային ամենաբարձր չափանիշներին համապատասխանող որակով»,- ասել է Սանդերսը:

Միջոցառմանը ներկա Հայաստանի արդյունաբերողների և գործարարների միության նախագահ Արսեն Ղազարյանն Ընկերությանը պարգևատրել է Հայաստանի արդյունաբերողների և գործարարների ոսկե մեդալով, ընդգծելով, որ իր ղեկավարած միության մոնիթորինգային խումբն ուսումնասիրել է շուկան ու ոլորտը և առանձնացրել «Կոկա-Կոլա Հելլենիկ Արմենիա»-ի աշխատանքը բնական ռեսուրսների վերարտադրության, էներգիայի խնայման, տեղական համայնքների զարգացման ու բնակչության շրջանում առողջ ապրելակերպի հաստատման ուղղությամբ իրականացրած աշխատանքն ու արդյունքները:

 

 

«1996-ին ամերիկյան այս բրենդի մուտքը հայկական շուկա բարձրացրեց որակի ստանդարտների, սպասարկման, շուկայում աշխատելու, օրինական դաշտում աշխատելու, ինչպես նաև սոցիալական պատասխանատվության սանդղակը»,- նշել է Ղազարյանը:

Ընկերությունը 2002-2005թթ. ղեկավարած Կոնստանտինոս Սպանուդիսի խոսքով, Հայաստանից իր մեկնելուց հետո երկիրը շատ է փոխվել, իսկ բիզնեսը՝ զարգացել. «Մեր բիզնեսը Հայաստանում ծաղկել է երկրին զուգահեռ»:

 

«Կոկա-Կոլա Հելլենիկ Արմենիա»-ն մոտ 8 տարի ղեկավարած Գագիկ Դանիելյանի խոսքով, ընկերության հաջողության գրավականն այն է, որ 20 տարվա ընթացքում կարողացել են հասնել գործընկերների հետ փոխշահավետ գործակցության՝ նպաստելով միմյանց բիզնեսի զարգացմանը:

«Գործընկերների հետ մեր աշխատանքն ի սկզբանե միտված էր երկարատև գործակցության: Այսօր ունենք գործընկերներ, որոնց հետ արդեն գրեթե 20 տարի աշխատում ենք»:

 

Միջոցառմանը մասնակցել են և ելույթ ունեցել նաև Հայաստանում Հունաստանի ու ԱՄՆ դեսպանները, որոնք ողջունել են ընկերության 20 տարվա նվաճումներն ու նորանոր հաջողություններ մաղթել հետագա գործունեությունում: Համերգային ծրագրով ուղեկցվող երեկոն ավարտվել է տոնական տորթը կտրելու արարողությամբ: