Կենդանիների պլանային պատվաստումներին խոչընդոտելը կպատժվի տուգանքով

«Գյուղատնտեսական կենդանիների պատվաստում» ծրագրի շրջանակում ապրիլի 1-ից հանրապետության ողջ տարածքում իրականացվում են պատվաստումներ դաբաղի նոր՝ AG-VII ենթատեսակի կանխարգելման նպատակով:

Վերջին ամիսներին տարածաշրջանի երկրներում, մասնավորապես հարեւան Թուրքիայում եւ Իրանում, արձանագրվել էր դաբաղի հենց այս ենթատեսակը, որի տարածման վտանգն առկա է նաեւ մեր հանրապետությունում:

Ինչպես հաղորդում են ՍԱՊԾ մամուլի ծառայությունից, հանրապետության տարածքում արդեն իրականացվել է պատվաստումների շուրջ 70 տոկոսը: Մինչ այդ Ռուսաստանի Դաշնությունից ձեռք էր բերվել նոր ենթատեսակի դեմ պայքարող պատվաստանյութի առաջին խմբաքանակը՝ 1 միլիոն 200 հազար դոզա:

Այդուհանդերձ, մի քանի համայնքների գյուղացիական տնտեսություններում ինչպես նախորդ տարիներին, այնպես էլ հիմա, որոշակի խոչընդոտներ են ստեղծվում կանխարգելիչ միջոցառումների ընթացքում՝ չհիմնավորված տարբեր պատճառաբանություններով:

«Սննդամթերքի անվտանգության պետական ծառայությունը հորդորում է չխոչընդոտել ծրագրի իրականացմանը եւ թույլ տալ համայնքն սպասարկող անասնաբույժ-մասնագետներին հաստատված ժամանակացույցի համաձայն իրականացնել պատվաստման աշխատանքները, քանի որ չպատվաստված կենդանու՝ դաբաղով վարակվելու վտանգը շատ բարձր է, իսկ հիվանդության տարածման աղբյուրը հիվանդ կենդանին է»,- հայտնում են ՍԱՊԾ-ից:

Նշենք, որ կենդանիների եւ մարդկանց համար վարակիչ հիվանդությունների դեմ պայքարի միջոցառումների իրականացման համար անհրաժեշտ պայմաններ չստեղծելը եւ խոչընդոտելը ենթակա է վարչական տուգանքի:

Քրիստինա Տեր-Մաթեւոսյան