Հայաշատ Եվրատեսիլ. «Եվրատեսիլ-2016»-ի բեմում կհայտնվեն ևս երկու հայ (լուսանկարներ)

Wnews.am-ը գրում է.

Եվրատեսիլն այս տարի հայաշատ է լինելու: Բացի Հայաստանը ներկայացնող գեղեցկուհի Իվետա Մուկուչյանից, Եվրատեսիլի բեմում կհայտնվեն ևս երկու հայ: «Եվրատեսիլ-2016»-ն այս տարի  կկայանա մայիսի 10-ին, 12-ին և 14-ին Շվեդիայի մայրաքաղաք Ստոկհոլմում: Արդեն հայտնի են Եվրատեսիլի առաջին կիսաեզրափակչի հաղթողները: Նրանց շարքում է Իվետա Մուկուչյանը: Իսկ մեր երկու հայրենակիցներին կտեսնենք մայիսի 12-ին:

Wnews.am-ը ներկայացնում է նրանց։

Ուկրաինա.

Երգչուհի Ջամալան կներկայացնի Ուկրաինան «Եվրատեսիլ-2016»-ում: 32-ամյա երգչուհին ծնվել է հայուհու և թաթարի ընտանիքում: Ջամալայի հայուհի մայրը  ևս երաժիշտ է. նա հրաշալի է երգում և դասավանդում է երաժշտական դպրոցում: Ջամալայի իսկական անունը Սուսաննա Ջամալադինովա է, միավորելով անունն ու ազգանունը ` աղջիկը ստացել է իր բեմական կեղծանունը: Երգչուհուն հաջողություն է բերել 2006թ Նոր Ալիք մրցույթը, որտեղ նա գրավել է առաջին հորիզոնականը: Ջամալան «Եվրատեսիլ-2016»-ին ընտրվել է հանդիսատեսի քվերակության շնորհիվ :

Վրաստան.

Վրաստանն այս տարի միջազգային մրցույթում կներկայացնի  Young–Georgian-Lolitaz խումբը, որի անդամներից մեկը ևս հայ է:  Young–Georgian-Lolitaz ռոք խմբի թմբկահարը Դիմա Հովհաննիսյանն է: Նա խմբին է միացել 2015-ին, մինչ այդ մեր հայրենակիցը նվագել է վրացական մի շարք բենդերում. «Նա մեր երկրի լավագույն թմբկահարներից է»,-ասում է խմբի հիմնադիր Նիկա Քոչարովը: Դիմա Հովհաննիսյանը նաև դասավանդում է երաժշտական դպրոցում և ունի իր անձնական խումբը, որը կազմված է պատանի երաժիշտներից։