Հայրս շատ խիստ էր,ասում էր՝ երբ մտնում ենք տուն, մտնում եք Հայաստան. Իվետա Մուկուչյան

Wnews.am-ը գրում է.

Իվետան, անշուշտ, անթերի ելույթ ունեցավ Եվրատեսիլյան բեմում, բայց պակաս կարևոր չէին մեր մասնակցի ներքին ազատությունը,  վստահ ու համոզիչ պահվածքը…

Երգչուհի Իվետա Մուկուչյանը, ով երեկ փայլեց «Եվրատեսիլ»-ի կիսաեզրափակիչ փուլի բեմում, մանկուց է երազել երգչուհի դառնալու մասին, սակայն, ինչպես ինքն է խոստովանում, փոքր ժամանակ չի ունեցել այն ինքնավստահությունը, որն ունի հիմա։

Wnews.am-ը ներկայացնում է երգչուհու առաջին քայլերը երգարվեստում եւ նրա ընտանիքի՝ Գերմանիա տեղափոխվելու պատմությունը։

Իվետա Մուկուչյանի մայրը՝ Սուսաննա Ամբարյանը պատմում է, որ ընտանիքի՝ Գերմանիա տեղափոխվելն անսպասելի է եղել.

«Այն ժամանակ ես աշխատում էի տուրիստական բյուրոյում։ Ամուսնուս համոզեցի, որ Գերմանիա մեկնի մեքենա գնելու նպատակով։ Այնպես ստացվեց, որ նա այնտեղ երկար մնաց եւ ամիսներ անց, երբ ինքս մեկնեցի Գերմանիա, որոշում կայացրի երեխաներին եւս տանել եւ միասին ապրել այնտեղ։1995թ. կրկին Հայաստան վերադարձանք որպես հյուր, այդ ժամանակ մեր երկրում լույս չկար, ծանր վիճակ էր, այդ պատճառով էլ կրկին վերադարձանք Գերմանիա»։

Իվետա Մուկուչյանի մայրը նշում է, որ տանը միշտ հայերեն են խոսում. «Դա իմ ամուսնու սկզբունքն է»։

«Հայրս շատ խիստ էր եւ ասում էր՝ երբ մտնում ենք տուն, մտնում եք Հայաստան»,- պատմում է Իվետան։

Իվետա Մուկուչյանի բեմական հակումները եկել են մանկությունից։ «Երբ 12 տարեկան էի, երգում էի խմբակում, ինձ հանձնարարեցին երգել Սելին Դիոնի երգը, այն կատարելուց հետո ուսուցչուհիս լսելով ինձ՝ մորս խորհուրդ տվեց, որ ինձ տանի երաժշտական դպրոց եւ այդպես էլ եղավ»։

Իվետա Մուկուչյանն ունի նաեւ դիզայների մասնագիտություն.

«Ես իմ կյանքում մի փուլում էի, երբ չգիտեի՝ որ ուղղությամբ գնալ։ Երաժշտությունն իմ մեջ կար, բայց ես վախենում էի։ Այն ժամանակ այնքան ինքնավստահ չէի, ինչպես հիմա եմ, ամաչկոտ էի, վախից ընդունվեցի Գերմանիայի դիզայն ակադեմիա, որտեղ ընդունվելը բավականին բարդ էր։ Ավելի շատ իմ ծնողների ցանկութունն էր, որ ես երաժշտական ուղղությունն ընտրեի։ Ուսումնառությանս տարիներին ամբողջ օրը կարի մեքենայի մոտ էի։ Մի օր հայրս եկավ տուն ու զայրացավ՝ չեմ ուզում երեխաս կարի մեքենայի մոտ նստի, նա պետք է բեմում լինի։ Այնուհետեւ երբ որոշում կայացրի երգչուհի դառնալու մասին, եկա Երեւան եւ ընդունվեցի Երեւանի կոնսերվատորիա»,- պատմում է երգչուհին։

Իվետա Մուկուչյանը Հայաստանում բոլորիս հայտնի դարձավ   «Հայսուպերսթար» նախագծից։ Եկեք վերհիշենք նրա առաջին քայլերը.