Հայկի, Սոնայի, Սևակի, Նարինեի և «‪The Beautified Project»-ի էմոցիոնալ ու հայրենասիրական համերգը

Blognews.am-ը գրում է.

Հովհաննես Թումանյանի անվան Տիկնիկային թատրոնում Հաղթանակի եռատոնի կապակցությամբ երեկ կայացավ Հայկ Պետրոսյանի, Սոնա Ռուբենյանի, Սևակ Ամրոյանի, Նարինե Դովլաթյանի և «‪The Beautified Project»-ի բարեգործական համերգը, որի ժամանակ հնչեցին թեմատիկ երգեր։ Համերգի հասույթը տրամադրվեց ապրիլյան պատերազմում ծանր վիրավորված Ռուբեն Առաքելյանին։ Պրոդյուսեր Ալեքսանդր Մհերյանը Blognews-ին հայտնեց, որ պարտադիր ծախսերը չհաշված գոյացել է 600 հազար դրամ, որն էլ տրամադրվել է Ռուբենի մայրիկին՝ տկն Անահիտին։ Նրանք գումարը տկն Անահիտին տվեցին հանդիսատեսի ներկայությամբ, քանի որ վերջին շրջանում շատ է քննարկվում, որ բարեգործությունների համար հավաքված գումարը յուրացում է։

Տկն Անահիտն իր շնորհակալությունը հայտնեց օգնության համար, մինչդեռ շնորհակալություն պետք է հայտնի հասարակությունը։ Այդ շնորհակալությունը հանդիսատեսի շարքերում նստած յուրաքանչյուր աչքերում էր։ Ի դեպ, տոմսերն այնքան էին վաճառվել, որ հանդիսատեսից ոմանք կանգնած էին հետևում համերգին։

Հայկը, Սոնան, Սևակը, Նարինեն և «‪The Beautified Project»-ի տղաները ներկայացրին հայրենասիրական ոգով երգեր։ Սևակ Ամրոյանը, խոսելով «Ախպերս ու ես» երգի մասին, որն այս օրերին առաջնորդող երգերից մեկն է դարձել, նշեց, որ երգը ծնվել է սահմանին՝ Ղարաբաղյան շարժման ժամանակ. «Հեղինակը՝ Աշոտ Բեգոյանը, հենց շարժման մասնակից է եղել։ Ինձ համար անսպասելի էր, որ երգն այսպիսի մեծ տարածում գտավ։ Չէի ցանկանա նմանատիպ իրավիճակում երգն այսպիսի տարածում գտներ, բայց մի կողմից էլ ճաշակ է փոխվում։ Այսպիսի համերգները ոգեշնչում են հասարակությանը։ Շատ անմիջական համերգ է։ Մենք ընկերներով հավաքվել ենք, որ ժողովրդին հուզենք, ուրախացնենք, ոգեշնչենք»։

Հայկ Պետրոսյանն էլ նշեց, որ ապրիլի 1-ի գիշերը քնեցինք այլ, ապրիլի 2-ին արթնացանք ուրիշ երկրում. «Հայաստանում իրականություն փոխվեց, մենք հասկացանք, թե ինչպիսի հերոսություն էր պետք Արցախյան պատերազմը հաղթելու, Շուշին ազատագրելու համար։ Մեր տղաներն ապացուցեցին, որ այսօր էլ հերոսներ ունենք։ Այսօր հավաքվել ենք մեր հերոս եղբոր համար, որպեսզի օգնության ձեռք մեկնենք նրան»։

«‪The Beautified Project»-ի վոկալիստ Անդրե Սիմոնյանը նշեց, որ իրենք կատարել են իրենց հայերեն երգերը։ Անդրեն և Նարեինե Դովլաթյանը հանդես եկան նաև զուգերգով։ Նրանք միասին կատերեցին «Արի իմ սոխակ» երգը. «Նարինեն փորձի ժամանակ ասաց՝ բասերը պահիր, շատ հետաքրքիր ստացվեց, որոշեցինք  միասին երգել»։ Նարինեն էլ նշեց, որ թեև 1 օրվա ընթացքում են որոշել միասին կատարել այս ստեղծագործությունը. «Անդրեն պրոֆեսիոնալ է, դրա համար էլ բարդ չէր 1 օրվա ընթացքում պատրաստվել։ Միշտ ցանկացել եմ երգել «Արի իմ սոխակը»։ Ուրախ եմ, որ վերջապես կատարեցի, հավանաբար, նաև՝ կձայնագրեմ»։

«‪The Beautified Project»-ից Առլեն Շահվերդյանն էլ նշեց, որ հայտկապես այս ժամանակահատվածում շատ կարևոր են նմանատիպ ոգով բարեգործական համերգները։ «Մեր զինվորները պետք է տեսնեն, որ թե՛ հոգեպես, թե՛ ֆինանսապես աջակցում ենք իրենց որքանով որ կարող ենք։ Այս համերգները շարունակական են լինելու»,- ասաց Առլեն Շահվերդյանը։

Համերգի վերջում բոլոր մասնակիցները միասին կատարեցի Հայոց բանակի հիմնը՝ «Երազ իմ երկիր»-ը, հանդիսատեսն այս երգը լսեց հոտնկայս։

Նյութը՝ Ամալյա Հովհաննիսյանի

Լուսանկարները՝ Կարեն Հովհաննիսյանի