Ադրբեջանից հեռացել է հերթական արտասահմանյան ընկերությունը

Ադրբեջանից հեռացել է հերթական արտասահմանյան, այս անգամ` իտալական Maccaferri ընկերությունը, որն զբաղվում է տարածքների ճարտարագիտական պաշտպանության ոլորտում կոմպլեքսային լուծումների մշակումներով:

Այս մասին, ինչպես հաղորդում է «Արմենպրես»-ը, հայտնում է ադրբեջանական fins.az լրատվական կայքը:

Ավելի քան 130 տարեկան Maccaferri- ի՝ Բոլոնիայում գտնվող գլխավոր գրասենյակում եւ 100-ից ավելի երկրներում տեղակայված 70 քույր ձեռնարկություններում աշխատում է մոտ 3 հազար աշխատակից:

Դա Ադրբեջանից արտասահմանյան ընկերության հեռանալու առաջին դեպքը չէ անցյալ տարվանից մանաթի գրեթե երկու անգամ արժեզրկման (2015 թվականի փետրվարի 21 եւ դեկտեմբերի 21) եւ ածխաջրածինների վաճառքից եկամուտների անկումն սկսվելուց հետո:

Ադրբեջանի պետական վիճակագրական ընկերությունն այդ առնչությամբ ավելի վաղ հայտնել է, որ 2015 թվականի արդյունքներով այդ երկրում գործունեությունը դադարեցրել են 71 արտասահմանյան ընկերություն եւ նրանց ներկայացուցչությունները, ինչը հանգեցրել է աշխատատեղերի եւ պետբյուջե հատկացումների կրճատմանը: Բացի այդ, դա նաեւ ներդրումների արտահոսք է նշանակում, ինչից խիստ երկյուղում է Ադրբեջանի քաղաքական իշխանությունը:

Ադրբեջանից հիմնականում հեռանում են նավթային նախագծերի սպասարկման եւ բյուջետային միջոցների յուրացման մեջ մասնագիտացած արտասահմանյան ընկերությունները:

Ցուցադրական է իտալական Todini ընկերության դեպքը, որը Ադրբեջանի պետական «Ազերյոլսերվիս» ընկերության հետ համատեղ զբաղվում էր ճանապարհաշինարարությամբ: Անցյալ տարի Ադրբեջանը լքել են նաեւ նշանավոր ֆրանսիական Technip Maritime Overseas, իտալական Maccaferri Azerbaijan եւ թուրքական Anel TelekomՖnikasyon Elektronik Sistemləri Sanayive Ticaret Anonim ընկերությունները եւ բրիտանական Amec Process & Energy Limited ընկերության ներկայացուցչությունը: