Նման թեմաներ քննարկելը գովելի չէ. Գագիկ Խաչատրյանը՝ օլիգարխների որդիների չծառայելու մասին

News.am-ը գրում է.

ՀՀ ֆինանսների նախարար Գագիկ Խաչատրյանը կարծում է՝ գովելի չէ այս պահին քննարկել օլիգարխների տղաների առաջնագծում լինելու հարցը:

«Ես կարծում եմ, որ բոլորը պետք է ծառայեն բանակում ըստ օրենքի, ուղղակի պատերազմական շրջանում ավելի ցայտուն է երեւում սոցիալական բեւեռվածության խնդիրը: Միշտ էլ լինում են իրականության մեջ նման համադրություններ եւ այս պահին նման թեմաներ քննարկելը գովելի չէ: Ցանկացած մարդ, եթե կարող է, պետք է իր օժանդակությունը ցուցաբերի բանակին, նաեւ կառավարությունը»,- այսօր՝ մայիսի 9-ին, Հաղթանակի զբոսայգում լրագրողների հետ զրույցում ասաց Գագիկ Խաչատրյանը՝ վստահեցնելով, որ իր որդիներն այս պահին առաջնագծում են. «Թե ինչ ծրագրեր են այնտեղ իրականացնում, չեմ կարող ասել»:

Լրագրողի հարցին՝ ի՞նչ սոցիալական արդարության մասին է խոսքը, եթե իր եւ իր կնոջ ունեցվածքը միլիարդներով են չափում, նախարարը պատասխանեց. «Եթե տենց համեմատության մեջ դնենք, ձեր մեջ էլ կարող է լինել տարբերություն, ես միշտ ասել եմ, որ պետք է վախենալ ոչ թե հայտարարագրված, այլ չհայտարարագրված գումարներից»:

Հարցին՝ ինչպե՞ս եղավ, որ այդքան գումար կարողացավ կուտակել նախարար լինելով, Գագիկ Խաչատրյանը պատասխանեց, որ դա երկար տարիների աշխատանքի արդյունք է:

Նա նաեւ վստահեցրեց, որ, ինքն էլ, մյուս պաշտոնյաներն էլ, օգնություն ցուցաբերել են  Ղարաբաղին: «Ես ինքս էլ օժանդակել եմ, բայց դա հրապարակման ենթակա չէ: Այն ծրագրերը, որոնք մենք ենք իրականացնում, հրապարակման ենթակա չեն»,- ասաց նա: