Life.panorama.am-ը գրում է.
Վերջին շրջանում շատերն անհամբեր սպասում են Ստոկհոլմում կայանալիք «Եվրատեսիլ 2016»-ին, ուր Հայաստանը կներկայացնի Իվետա Մուկուչյանը:
«Եվրատեսիլ»-ի հայաստանյան պատվիրակությունն արդեն մի քանի օր է Ստոկհոլմում է, նրանք մեծ պատասխանատվությամբ ու առանձահատուկ կերպով պատրաստվում են ընդամենը մի քանի օրից մեկնարկող միջազգային ամենահայտնի մրցույթին, իսկ մինչ այդ Ստոկհոլմից Հանրային հեռուստաընկերության հասարակայնության հետ կապերի բաժնի պետ Արուսյակ Զախարյանը Life.panorama.am-ին մանրամասներ է հայտնել մրցույթից եւ մեր մասնակցի նախամրցութային գործունեությունից.
«Մայիսի 1-ից «Եվրատեսիլ»-ի հայաստանյան պատվիրակությունը Ստոկհոլմում է եւ այս օրերի ընթացքում հասցրել է բազմաթիվ հանդիպումներ ունենալ ինչպես «Եվրատեսիլ»-ի կազմակերպիչների, այնպես էլ տարբեր հեղինակավոր լրատվամիջոցների ներկայացուցիչների հետ: Մայրիսի 2-ին կայացավ մեր առաջին փորձը, որի ընթացքում Իվետա Մուկուչյանն առաջին անգամ «Եվրատեսիլի» բեմում կատարեց իր «Love Wave» մրցութային ստեղծագործությունը ու չափազանց դրական գնահատվեց ներկաների ու լրատվամիջոցների շրջանում. ինչպես հայտնի է՝ վերջիններիս կողմից Իվետայի ելույթը առաջին փորձից հետո լավագույնը ճանաչվեց թե իր ձայնի հզորությամբ, թե բեմականացմամբ»,- պատմեց Արուսյակ Զախարյանն ու շարունակեց.
«Առաջին փորձից հետո կայացավ նաեւ Իվետայի մասնակցությամբ մամուլի ասուլիս, որին ներկա էին միջազգային ամենահեղինակավոր լրատվամիջոցների ներկայացուցիչները. նրանց կողմից մեծ հետաքրքրություն կար Իվետա Մուկուչյանի եւ այս տարվա Հայաստանի մասնակցության նկատմամբ: Ասուլիսի ընթացքում Իվետան սպառիչ կերպով պատասխանեց հարցերին, ներկայացրեց, թե ի՞նչ նախամրցութային ընթացք ենք անցել, ի՞նչ անելիքներ են եղել եւ ի՞նչ սպասելիքներով է նա մասնակցում «Եվրատեսիլ-2016»-ին»:
Մայիսի 3-ին Իվետա Մուկուչյանն ու հայաստանյան պատվիրակությունը հանդիպում են ունեցել նաեւ Ստոկհոլմի հայ համայնքի ներկայացուցիչների հետ.
«Առանց չափազանցությունների՝ հայ համայնքի հետ մեր հանդիպումը շատ ջերմ մթնոլորտում կայացավ: Մեր հայրենակիցները կարողացան այնքան դրական էներգիա փոխանցել, որ Իվետան այդ ամենով ոգեւորված եւ ինչպես ինքն է սիրում նշել՝ զինված, կբարձրանա եվրատեսիլյան բեմ: Իվետան հայ համայնքի ներկայացուցիչների հետ հանդիպմանը նշեց, որ շատ լավ է հասկանում, թե ինչ է նշանակում ապրել հայրենիքից հեռու եւ այդ առումով խորհրդանշական համարեց հայրենիքից հեռու հանդիպել մեր հայրենակիցների հետ ու մեկմեկու փոխանցել կուտակված կարոտը: Ի դեպ՝ այդ օրը հանպատրաստից փոքրիկ համերգային շոու իրականացվեց, մեր բեք-վոկալիստները կատարեցին «Կիլիկա», «Երազ իմ երկիր հայրենի» երգերը, ինչպես նաեւ կենդանի հնչեղությամբ Իվետան երգեց «Love Wave» ստեղծագործությունը»,- նշեց Հանրային հեռուստաընկերության հասարակայնության հետ կապերի բաժնի պետը:
«Եվրատեսիլ» երգի միջազգային մրցույթը դիտում են եվրոպական ավելի քան 40 երկրներում, այն գրեթե 200 միլիոն հեռուստադիտող ունի: Հենվելով մրցույթի այս կարեւոր փաստերի վրա, Արուսյակի փոխանցմամբ, մասնակիցներն ու պատվիրակությունը, ինչպես եւ Ստոկհոլմի հայ համայնքը հասկանում են մեր երկրի համար այս մրցույթի կարեւորությունը. սա միջոց է եւս մեկ անգամ գրեթե ողջ աշխարհին ներկայացնելու մեր երկիրը:
Վաղը՝ մայիսի 6-ին «Եվրատեսիլ-2016»-ի շրջանակում կկայանա մրցույթի երկրորդ փորձը.
«Վաղը մեզ համար ոչ պակաս կարեւոր օր է, քանի որ պետք է պահել այն հետաքրքրությունն ու ակտիվությունը, որը կար առաջին փորձից հետո: Իվետայի տրամադրությունը շատ բարձր է, կա հաղթական տրամադրվածություն, ինչի շնորհիվ նա անելու է ամեն հնարավորը, որպեսզի վաղվա ելույթը եւս լինի բարձր որակի, ինչին բոլորս ենք ձգտում»,- հավելեց Արուսյակ Զախարյանը:
Զրույցի ընթացքում անդրադարձանք նաեւ եվրատեսիլյան բեմում Իվետա Մուկուչյանի առաջին փորձից հետո նրա զգեստի վերաբերյալ Հայաստանում բարձրացված աղմուկին, որին ի պատասխան Հանրային հեռուստաընկերության հասարակայնության հետ կապերի բաժնի պետը ժպիտով նշեց.
«Ինչ վերաբերվում է հագուստին, ապա որեւէ բան այս պահին չեմ կարող հայտնել, ամեն ինչ պարզ կդառնա վաղվա փորձից»:
Հիշեցնենք, որ «Եվրատեսիլ-2016»-ը կկայանա մայիսի 10-ին, 12-ին եւ 14-ին Ստոկհոլմում: Հայաստանը առաջին կիսաեզրափակիչ փուլի ընթացքում ելույթ կունենա 7-րդ համարի ներքո: Ի դեպ՝ երեկվանից հասանելի է «Love Wave» երգի ռեմիքս տարբերակը:
