Գուրգեն Արսենյանը 90 միլիոն դրամ արժողությամբ նկարների հավաքածու ունի

ԱԺ պատգամավոր Գուրգեն Արսենյանը նախորդ տարի թանկարժեք նկարներ է ձեռք բերել: Տասը նկարի համար նա վճարել է 90 միլիոն 500 հազար դրամ: Սրանից բացի՝ 2015թ. ԲՀԿ-ական պատգամավորը ձեռք է բերել երկու հողամաս՝ ընդհանուր 33 միլիոն դրամով արժողությամբ եւ 95 միլիոն դրամ արժողությամբ MERCEDES-BENZ S63 AMG մակնիշի ավտոմեքենա:

Արսենյանը նախորդ տարի նաեւ 26 հազար դրամ արժողությամբ բաժնեմաս է ձեռք բերել: Նրա փոխառությունները նախորդ տարվա վերջին հետեւյալ պատկերն են ունեցել՝ 5 միլիոն 452 հազար 576 ԱՄՆ դոլար եւ 48 միլիոն 400 հազար դրամ:

Պաշտոնյայի դրամական միջոցները 2015թ. տարեսկզբին կազմել են 173 միլիոն 939 հազար 538 դրամ, 5 միլիոն 102 հազար 181 ամերիկյան դոլար եւ 19 հազար 837 եվրո: Արդեն տարեվերջին վերջինիս դրամական միջոցները կտրուկ նվազել են՝ դառնալով 24 միլիոն 525 հազար 266 դրամ, 1 միլիոն 351 հազար 751 ԱՄՆ դոլար եւ 23 հազար 276 եվրո:

Գուրգեն Արսենյանի մեկ տարվա աշխատավարձն էլ կազմել է 5 միլիոն 940 հազար 390 դրամ: Որպես եկամուտ է նշված 1 միլիարդ 718 միլիոն 727 հազար 738 դրամ շահաբաժինը, 16 միլիոն 560 հազար դրամ վարձակալությունից ստացված գումարը, 89 միլիոն 619 հազար 547 դրամ փոխառություններից ստացված տոկոսը: Բացի այդ՝ հայտարարագրում նշում կա նաեւ այլ եկամուտների վերաբերյալ՝ 600 հազար դրամի չափով: Իսկ ամբողջության մեջ պատգամավորի մեկ տարվա եկամուտը կազմել է 1 միլիարդ 831 միլիոն 447 հազար 675 դրամ:

Քրիստինա Տեր-Մաթեւոսյան