Ջուս. «Նշանդրեքը վրաս չի գալիս, այս անգամ միանգամից կամուսնանամ»

Blognews.am-ը գրում է.

Այս օրերին  Ջուսն իր անվան շուրջ նոր ինտրիգ է ստեղծել՝ հրապարակելով նոր ընտրյալի լուսանկարները։ Հենց այս մասին  էլ  BlogNews-ը զրուցեց երգչուհու հետ։

   

- Ջուս, գարունը միշտ բուռն է լինում քո անձնական կյանքում։

-Հա, ես սիրում եմ գարունը, ինձ համար գարունը կապ ունի սիրո հետ և պետք է սերն անպակաս լինի գարնանը։

-Ինչպե՞ս ձևավորվեցին հարաբերություններդ Վահագնի հետ։

-Մեզ մոտ ամեն ինչ դեռ զարգացման փուլում է։ Ծանոթացել ենք Ֆեյսբուքով, 10 ամիս շփվել ենք։ Կես ամիս առաջ որոշեցինք հանդիպել ու ամեն ինչ սկսվեց։

-Ի՞նչն էր պատճառը, որ տասն ամիս շփվում էիք, բայց չէիք հանդիպում։

-Չգիտեմ, երևի չէինք համարձակվում հանդիպել, չէր ստացվում։ Կես ամիս առաջ որոշեցինք ու հանդիպեցինք։ Առաջին հանդիպումը գետի ափին էր, ամեն ինչ շատ գեղեցիկ էր։ Հետո զգացինք, որ շատ նման ենք իրար, որովհետև ինչ ասում եմ, նա  շարունակում է կամ կարող ենք նույն րոպեին նույն բանն ասել։ Կարճ ժամանակ է, ինչ հանդիպում ենք, բայց դա կապ չունի, մեզ մոտ ամեն ինչ լուրջ է գնում։ Վահագնը շատ լավ հումոր ունի, ինչն ինձ համար շատ կարևոր է, քանի որ տղամարդու հումորն ինտելեկտի նշան է։ Ինձ դուր է գալիս, որ նա լուրջ տղամարդ է, լուրջ փաստաբան է, Եվրոպայի, Ռուսաստանի և Հայաստանի ըմբշամարտի չեմպիոն։ Մինչև հիմա էլ առավոտյան ժամը 6-ին արթնանում ու պարապում  է։ Նախորդ տարի էլ դարձավ տարվա լավագույն փաստաբան։

-Վահագնը ամուսնալուծված է։ Երբ սկսեցիք շփվել, նա դեռ ամուսնացա՞ծ էր։

- Չէ, նա նախորդ տարվա հունվարին է ամուսնալուծվել, մենք ավելի ուշ ենք  սկսել շփվել։ Իր կնոջ հետ էլ հարաբերությունները ցիվիլ են։ Բոլորն ամեն ինչ հասկանում են։

-Իր դստեր հետ հանդիպե՞լ եք, ի՞նչ հարաբերություններ ունեք։

-Դեռ չենք հանդիպել, սակայն առաջիկա օրերին արդեն կհանդիպենք։  Նա գիտի իմ մասին, մենք հեռակա լավ հարաբերություններ ունենք։

-Ամեն դեպքում ամուսնալուծությունը երեխայի համար թարմ է, նման դեպքերում երեխաները միշտ չէ, որ ըմբռնումով են մոտենում։

-Չէ նա 8 տարեկան է, բայց շատ խելացի աղջիկ է։

-Հարաբերություններն օրինականացնելու մասին արդեն մտածո՞ւմ եք։

-Այո, սակայն ամառն անցնի, նոր։ Մենք ուղղակի երջանիկ ենք, որ գտանք իրար։ Մնացածն արդեն ժամանակը ցույց կտա, բայց այս անգամ միանգամից կամուսնանամ, նշանդրեքը վրաս վատ ա գալիս։)

-Ի դեպ, նշանվելու մասին. նախորդ անգամ շատ արագ զարգացած հարաբերությունդ միանգամից լրջացավ և հասավ նշանդրեքի, սակայն կարճ ժամանակ անց այն ավարտվեց։ Քեզ համար ռիսկային չէ՞ր նորից հանրությանը հայտնել շատ արագ զարգացող հարանբերությունների մասին։

-Շատերն ասում են, որ շուտ էր ամեն ինչ հրապարակայնացնելու մասին, սակայն կարծում եմ, որ լինող բանը կլինի, չլինողը՝ չէ։ Հիմա ամեն ինչ լավ է, իհարկե, հետագան ժամանակը ցույց կտա։

Չեմ կարծում, որ նրանք նույն մարդիկ են, այսինքն՝ նա մի քիչ անլուրջ էր, Վահագնը ահավոր լուրջ տղամարդ է։ Եթե մենք հաստատ չիմանայինք, որ դա լուրջ է, չէինք հրապարակի լուսանկարներ, քանի որ նրան էլ բոլորը շատ լավ գիտեն, նա էլ իր ոլորտում  է հայտնի։ Երեխայություն կլիներ, եթե անլուրջ հարաբերությունների դեպքում լուսանկարներ հրապարակեինք։

-Ռիչարդի հետ ի՞նչ հարաբերություններ եք պահպանել։

-Իր հետ ընդհանրապես հարաբերություններ չեմ պահպանել, որովհետև արդեն ունեմ, Վահագնին, թեև մինչև Վահագն էլ չէի խոսում իր հետ։ Ես խզել ենմ կապ ու վերջ, ինձ մոտ այդպես է։

-Նախորդ անգամ մեր զրույցի ժամանակ ասացիր, որ մայրդ պայման էր դրել Ռիչարդի առաջ, ասել էր՝ մինչև աղջկաս համար տուն չգնես, քեզ աղջիկ չեմ տալու։ Վահագնի առաջ է՞լ է դրված այդ հարցը։

-Դե Ռիչարդը Ֆրանսիայից էր, բա տենց էր պետք։ Հիմա չկա նման խնդիր, որովհետև Վահագնը  տուն ունի, իսկ Ռիչարդը տուն չուներ, հայրական տուն  էր, որտեղ իր եղբոր ընտանիքն էր ապրում։

-Այս անգամ այս հարաբերություններդ որքանո՞վ են ամուր։

-Այս անգամ ես ընդհանրապես ինձ միայնակ չեմ զգում։ Ռիչարդը հեռու էր ապրում, կողքիս չէր, նաև՝ իրեն վատ պահեց, դրա համար խզեցինք ամեն ինչ։ Ես ու Վահագնը ամեն օր միասին ենք։ Նա ամեն առումով իսկական տղամարդ է։ Իր կողքին ես ինձ ավելի թույլ  եմ զգում, որովհետև ինքն ուժեղ տղամարդ է։

-Կանանց մոտ տարիքի հետ անձնական կյանքը դասավորելու խնդիր է առաջանում և սկսում են պահանջների առումով զիջումների գնալ։ Դու արդեն 20 տարեկան չես, այս առումով, հիմա հարաբերություններդ ավելի կոմպրոմիսայի՞ն ես կառուցում։

-Իդեալական տղամարդ կամ կին չկա, ես դա միշտ հասկացել եմ։ Ես երբեք չեմ կարծել, որ միայնակ կմնամ, ես մտածում եմ, որ մարդը կարող է 60 տարեկանում հանդիպի իր կեսին, բայց կհանդիպի։ Ես երբեք չեմ կոմպլեքսավորվել իմ տարիքից և նման խնդիր չեմ ունեցել։

-Դու հանրությանը հայտնի ես որպես ավելի բաց կերպար։ Ինչպե՞ս է կողակիցդ վերաբերում քո կարիերային։

-Շատ լավ։ Նա ինձ պես բաց անձնավորություն է, մենք երկուսս էլ և՛ լուրջ ենք, և՛ սիրում ենք արվեստը։ Նա ընդունում է, այն, ինչ ես անում եմ և չի ասում՝ սա չհագնես, սա փակի, սա կարճ է։ Վահագնը շատ ժամանակակից է։ Մենք վստահ ենք իրար վրա։

-Երևի դու էլ կխոստովանես, որ այն փուլում, երբ անձնական կյանքումդ փոփոխություն եղավ քո, մասին խոսվեց այնքան, որքան երբևէ չէր խոսվել։ Այս անգամ էլ հանդիպեցի մեկնաբանությունների, որ հենց քո մասին դադարում են խոսել, անձնական ինտրիգ ես ստեղծում, որպեսզի քո մասի նորից խոսեն։

-Չէ (ծիծաղում է), ես դա չեմ պլանավորում, ուղղակի այդպես է ստացվել։ Հիմա էլ 2 տեսահոլովակ ունեմ, որոնք կներկայացնեմ իմ հանդիսատեսին։

Ժողովրդին միշտ ավելի հետաքրքիր է անձնական կյանքը։ Այս անգամ էլ  Ֆեյսբուքում կարգավիճակս փոխեցի ու բոլորը սկսեցին գրել։  Ժողովորդը շատ լավ ընդունեց, իհարկե, կային նաև բացասական կարծիքներ, բայց դա բնական է։ Ավելի շատ դրական էին արձագանքները։