Բաքվի ջարդերը` հայուհու պատմության միջոցով. Ելենա Դուդիչը հանդես եկավ «Արմմոնո»-ի շրջանակում

 Բաքվի ջարդերի մասին` անձի ողբերգության միջոցով: «Արմմոնո» միջազգային թատերական ամենամյա 14-րդ փառատոնի շրջանակում դերասանուհի Ելենա Դուդիչը ցուցադրեց «Ռոմեոյի և Ջուլիետի մասին… միայն թե նրանց կոչում էին Մարգարիտա և Աբուլֆազ» ներկայացումն` ըստ գրականության ասպարեզում նոբելյան մրցանակի դափնեկիր Սվետլանա Ալեքսիևիչի «Սեքնդ հենդի ժամանակը» վեպի:

«Ներկայացումը հենց Բաքվի ջարդերի մասին է: Այն մտել է Բելառուսի Մոգիլյովի դրամատիկական թատրոնի խաղացանկ: Շատ կարևոր է, որ Բելառուսում ցուցադրվում է նման ներկայացում: Այն ներկայացվում է ամիսը մի քանի անգամ և  հրավիրված է մի քանի միջազգային փառատոնների»,-«Արմենպրես»-ի հետ զրույցում նշեց «Արմմոնո» փառատոնի տնօրեն Մարիաննա Մխիթարյանը:

Ներկայացումը հայկական Ջուլիետի և ադրբեջանական Ռոմեոյի սիրո պատմության մասին է, որը ծնվել է Բաքվի ջարդերի սարսափելի իրադարձությունների ժամանակ և անցել է թշնամանքի, մահվան, պատերազմի փորձությունների միջով, բայց մնացել է անմահ: Գլխավոր հերոսուհին պատմում է իր սիրո պատմությունն, անդրադառնում ադրբեջանական վայրագություններին ու խոստովանում, որ հիասթափվել է մարդկանցից:

Մարգարիտան վերհիշում է մինչ ջարդերը տեղի ունեցած իրադարձությունները, պատմում, որ տարբեր ազգեր ընկերություն էին անում, սակայն ողբերգական դեպքերն ամեն ինչ փոխեցին: Տառապանքն ու ցավը, որոնց միջով անցել է հերոսուհին, չեն կոտրել նրան: Ականատեսի աչքերով հայուհին պատմում է, թե ինչպես էին ադրբեջանցի երեխաները փողոցում կռիվ-կռիվ խաղում և «հայերի ջարդ» կազմակերպում` ծեծելով խրտվիլակի. հետո այդ ամենը վերածվում է իրականության: Հերոսուհին նշում է, որ իր և ընտրյալի ընտանիքները դեմ են եղել նրանց սիրուն, քանի որ նրանց համոզմամբ` հայն ու ադրբեջա նցին թշնամիներ են և չեն կարող իրար սիրել: Մարգարիտան իր և Աբուլֆազի սերը համեմատում է Ռոմեոյի և Ջուլիետի սիրո պատմության հետ:  

Նա ցավով նշում է, որ սումգայիթյան ողբերգությունների մասին լռում էին թերթերն ու հեռուստատեսությունը, բայց բամբասանքները պտտվում էին ամենուր: Մարգարիտան պատմում է, որ Բաքվի ջարդերի ընթացքում ադրբեջանցիները սպանում էին ոչ միայն հայերին, այլև նրանց, ովքեր թաքցրել են հայերին, վերհիշում է սոսկալի իրադարձությունները, վերապրում դաժան ակնթարթները:

ՀՀ Առաջին տիկին Ռիտա Սարգսյանի բարձր հովանու ներքո, ՀՀ մշակույթի նախարարության և Հայաստանի թատերականգործիչների միության աջակցությամբ`ապրիլի 29-ից մայիսի 3-ն անցկացվում է «Արմմոնո» միջազգային թատերական ամենամյա14-րդ փառատոնը: Փառատոնի շրջանակում կցուցադրվի 26 ներկայացում (Մե ծ Բրիտանիա, Շվեյցարիա, Ֆրանսիա, Իսրայել,Բելառուս, Լեհաստան, Լիտվա, Ռուսաստան, Վրաստան և Հայաստան):  Այս տարի կցուցադրվեն բազմատեսակմոնոներկայացմումներ՝ մոնոպար, մոնոմնջախաղ, մոնոդրամա, մոնոստենդափ և այլն: