Հայաստանը Եվրոպական թանգարանային ֆորումի մրցանակաբաշխությանը ներկայացրել է Կոմիտասի թանգարան-ինստիտուտը

 Հայաստանը Եվրոպական թանգարանային ֆորումի (European museum forum) տարեկան մրցանակաբաշխությանը ներկայացրել է Կոմիտասի թանգարան-ինստիտուտը: «Արմենպրես»-ի հետ զրույցում այս մասին տեղեկացրեց Եվրոպական թանգարանային ֆորումի ազգային թղթակից Մարինե Մկրտչյանը:

«Եվրոպական թանգարանային ֆորումի նպատակն է խրախուսել թանգարանային նորարարությունները: Այն ունի մրցանակաբաշխություն, որին մենք առաջին անգամ ներկայացրինք Կոմիտասի թանգարան-ինտիտուտը: Մենք ցույց տվեցինք, որ Հայաստանում ևս նոր թանգարաններ են բացվում և թանգարանային գործը զարգանում է»,-նշեց Մարինե Մկրտչյանը:

Եվրոպական թանգարանային ֆորումի տարեկան 39-րդ մրցանակաբաշխությունը (The European Museum of the Year Award) տեղի է ունեցել ապրիլի 6-10-ն Իսպանիայում:

Մկրտչյանի խոսքով` հայաստանյան մշակութային օջախներից Կոմիտասի թանգարան-ինստիտուտն առաջինը մասնակցեց մրցանակաբաշխությանը, և անցավ եզրափակիչ փուլ:

«Մենք շնորհանդեսի միջոցով ներկայացրել ենք մեր թանգարանը: Մրցանակաբաշխությանը մասնակցել է 49 թանգարան: Մրցանակի է արժանացել Լեհաստանի հրեաների «Պոլին» պատմության թանգարանը (POLIN Museum of the History of Polish Jews) »,-հավելեց Մարինե Մկրտչյանը:

2013թ.  մայիսի  30-ին  ՀՀ նախագահ Սերժ Սարգսյանի առաջարկով  «Հայաստան» համահայկական հիմնադրամի  հոգաբարձուների խորհուրդն իր   նիստում որոշում ընդունեց Կոմիտասի թանգարան -ինստիտուտ  ստեղծելու  մասին:  Այդ որոշմամբ անհատույց օգտագործման իրավունքով ՀՀ մշակույթի  նախարարությանը տրամադրվեց Կոմիտասի անվան զբոսայգում գտնվող նախկին մշակույթի  պալատը,  որի հիման վրա կառուցվեց թանգարան-ինստիտուտի նոր շենքը: Թանգարանի նախագծի հեղինակն ու ճարտարապետն է Արթուր Մեսչյանը: Թանգարանն ունի 8 սրահ մշտական ցուցադրությամբ, որի հեղինակը եւ համադրողը Վարդան Կարապետյանն է, ձեւավորող–նկարիչը՝ Ալբերտո Տորսելոն: