Իջեւանում ապօրինի ծառահատումներ են իրականացվել

«Համահայկական բնապահպանական ճակատ» քաղաքացիական նախաձեռնությունն ահազանգ է ստացել Տավուշի մարզից, որի համաձայն՝ ՀՀ գյուղատնտեսության նախարարության «Հայանտառ» ՊՈԱԿ-ի Իջեւանի անտառտնտեսության տարածքում կան բազմաթիվ ապօրինի ծառահատումներ։

Մասնավորապես, ինչպես հաղորդում են ՀԲՃ քաղաքացիական նախաձեռնությունից, անտառում ողջ օրը տարբեր ուղղություններից լսվում են էլեկտրական սղոցների ձայներ` վաղ առավոտից մինչև ուշ երեկո: «Այս լուսանկարներն արված են միայն հիմնական հողային ճանապարհին հարակից տարածքներում, բայց եթե մի քիչ գնանք անտառի խորքերը՝ պատկերն ահավոր կլինի։ Բազմաթիվ ավելի փոքր ճանապարհներ տանում են դեպի նոր հատված տարածքներ: Բոլոր կոճղերի վրա կրկին բացակայում են օրինական հատումը հաստատող նշումները։ Թափված փայտի թեփը թարմ է, իսկ կոճղերը սևացրած, քանի որ ձյութանման նյութ են լցնում դրանց վրա, որպեսզի ստեղծեն հին հատման տպավորություն: Կան տարածքներ, որտեղ հատված ծառերն այրել են անվադողերի օգնությամբ»,- գրված է հաղորդագրության մեջ։

Ըստ նախաձեռնության անդամների՝ Հայաստանի անտառների պահպանության եւ վերականգնման ուղղությամբ գործուն միջոցառումներ չձեռնարկելու դեպքում մի քանի տասնամյակ անց մեր ժողովուրդն ականատես կլինի անտառապատ տարածքների կտրուկ նվազման՝ անկանխատեսելի էկոլոգիական հետեւանքերով։ Վերոհիշյալ տարածքում կատարված ծառահատումների վերաբերյալ լուսանկարները կարելի է տեսնել հետեւյալ կայքում՝ www.armecofront.net: