Պրահայում կայացել է հայ-չեխական գործարար համաժողով և միջկառավարական հանձնաժողովի նիստ

Չեխիայի մայրաքաղաք Պրահայում ապրիլի 25-ին մեկնարկել է Հայաստան-Չեխիա գործարար համաժողովը, որին մասնակցել են 15 ընկերություններ Հայաստանից և շուրջ 50 ընկերություններ Չեխիայից:  Այս մասին տեղեկացրին ՀՀ էկոնոմիկայի նախարարության տեղեկատվության և հասարակայնության հետ կապերի բաժնից՝ հավելելով. «Գործարար համաժողովը կազմակերպվել է Տնտեսական համագործակցության հարցերով հայ-չեխական միջկառավարական հանձնաժողովի երկրորդ նիստի շրջանակում, որը կայացել է ապրիլի 26-ին:

Տնտեսական համագործակցության հարցերով հայ-չեխական միջկառավարական հանձնաժողովի երկրորդ նիստին և գործարար համաժողովին մասնակցելու նպատակով ապրիլի 25-ին երկօրյա այցով Պրահա է մեկնել ՀՀ էկոնոմիկայի նախարարի առաջին տեղակալ Գարեգին Մելքոնյանի գլխավորած պատվիրակությունը:

Համաժողովի նպատակն էր ընդլայնել և ամրապնդել հայ-չեխական առևտրատնտեսական կապերը: Միջոցառման ընթացքում քննարկվել են երկու երկրների գործարարների ներդրումային առաջարկները: Հայաստանի զարգացման հիմնադրամը համաժողովի մասնակիցների համար կազմակերպել է Հայաստանի գո րծարար և ներդրումային միջավայրին նվիրված շնորհանդես: 

Հայաստանը ներկայացնող ընկերությունների գործունեության շրջանակը ներառել է շինարարության, տեղեկատվական տեխնոլոգիաների, թեթև արդյունաբերության,  առևտրի և այլ ոլորտներ։ Միջոցառման մասնակից գործարարների համար կազմակերպվել են փոխադարձ հետաքրքրություն ներակայացնող մի շարք հանդիպումներ։

Պրահայում ապրիլի 26-ին կայացել է հայ-չեխական տնտեսական համագործակցության հարցերով միջկառավարական հանձնաժողովի երկրորդ նիստը:

Հանձնաժողովի հայկական կողմի համանախագահն էր ՀՀ էկոնոմիկայի նախարարի առաջին տեղակալ Գարեգին Մելքոնյանը, չեխական կողմի համանախագահը` Չեխիայի արդյունաբերության և առևտրի նախարարի տեղակալ Վլադիմիր Բարթլը:

Հայկական կողմից հանձնաժողովի նիստի աշխատանքներին մասնակցել են ՀՀ էկոնոմիկայի, արտաքին գործերի, ֆինանսների, գյուղատնտեսության, էներգետիկայի և բնական պաշարների, տրանսպորտի և կապի, ինչպես նաև Հայաստանի Զարգացման հիմնադրամի, ՀՀ առևտրաարդյունաբերական պալատի, այլ շահագրգիռ կառույցների ներկայացուցիչներ:

Նիստի ընթացքում ք ննարկվել են Հայաստանի և Չեխիայի միջև առևտրատնտեսական, ֆինանսական, ներդրումային, գյուղատնտեսության, առողջապահության, կրթության և գիտության, մշակույթի, ստանդարտացման, տրանսպորտի, տեղեկատվական տեխնոլոգիաների, զբոսաշրջության, էներգետիկայի և այլ ոլորտներում համագործակցության զարգացման հնարավորություններն ու հեռանկարները:

Նիստի արդյունքում ստորագրվել է նիստի արձանագրությունը և ըստ ոլորտների սահմանվել են հետագա համագործակցության ուղղությունները:

Տնտեսական համագործակցության հարցերով հայ-չեխական միջկառավարական հանձնաժողովի երկրորդ նիստի շրջանակում ՀՀ Չափագիտության ազգային ինստիտուտի և Չեխիայի  չափագիտության ինստիտուտի միջև ստորագրվել է փոխըմբռնման հուշագիր:

Պրահայում ՀՀ էկոնոմիկայի նախարարի առաջին տեղակալ Գարեգին Մելքոնյանը հանդիպումներ է ունեցել Չեխիայի արդյունաբերության և առևտրի նախարար Յան Մլադեկի, նախարարի տեղակալ Վլադիմիր Բարթլի, Չեխիայի արտաքին գործերի նախարարի միջազգային տնտեսական հարցերով տեղակալ Մարտին Թլապայի հետ:

Հայ-չեխական տնտեսական համագործակցության հարցերով միջկառա վարական հանձնաժողովը հիմնվել է համաձայն 2014թ. հունվարի 30-ին կնքված«Հայաստանի կառավարության և Չեխիայի  կառավարության միջև տնտեսական և արդյունաբերական համագործակցության մասին» Համաձայնագրի` հայ-չեխական տնտեսական համագործակցության ամրապնդման և հետագա խորացման նպատակով:
Հայ-չեխական տնտեսական համագործակցության հարցերով միջկառավարական հանձնաժողովի հայկական կողմի կազմը հաստատվել է ՀՀ վարչապետի 2014թվականի հունիսի 20-ի N 576–Ա որոշմամբ: Հանձնաժողովի առաջին նիստը կայացել է 2014թ. սեպտեմբերի 11-ին` Երևանում»: