Հայոց ցեղասպանության թանգարան-ինստիտուտը ցուցադրություններ է կազմակերպել ամբողջ աշխարհով

Հայոց ցեղասպանության թանգարան-ինստիտուտի տնօրինությունը ներկայացրեց մեկ տարվա ընթացքում թանգարանի իրականացրած գործունեությունն ու ձեռքբերումները՝ ընդգծելով, որ աշխատանքները դեռ շարունակվում են:

ՀՑԹԻ տնօրեն Հայկ Դեմոյանը նախ կարևորեց թանգարանում բացված նոր ցուցադրությունը, որը շատ բարձր գնահատական և դրական արձագանքներ է ստացել: Այնուամենայնիվ, տնօրինությունը պատրաստ է լսել նոր առաջարկներ:
Նրա խոսքով՝ մշտական ցուցադրությունը բացվել է 2015թ, ապրիլի 21-ից և ունեցել  շուրջ 180 հազար այցելու, որոնցից 1500-ը Թուրքիայի քաղաքացիներ էին: Դրանից զատ՝ աշխարհի շուրջ 50 թանգարաններում ներկայացվել են ՀՑԹԻ ժամանակավոր ցուցադրությունները, այդ թվում՝ Նովոսիբիրսկում և Վալանսում, իսկ մայիսից ցուցադրություններ կբացվեն  Մարսելում և Փարիզի նշանավոր «Մազարինի» գրադարանում: «Առանձնահատուկ է լինելու Ռիգայում հրեական գետոյի տարածքում Հայոց ցեղասպանության թեմայով  մայիսին բացվող  մշտական ցուցադրությունը»,- ավելացրեց Դեմոյանը: 

ՀՑԹԻ տնօրենը նաև նշեց, որ տարբեր երկրներում թանգարանային ցուցադրություններ բացելու ու համագործակցելու առաջարկներ կան, և այդ առիթով ստորագրվել են մի շարք պայմանագրեր: «Տարիների տքնաջան աշխատանքի արդյունքում հաջողվեց գրավել միջազգային հեղինակավոր հաստատությունների` մասնավորապես թանգարանների ուշադրությունը և հ ասնել նրանց հետ համագործակցության: Պլանավորում ենք հետագայում գիտական կադրեր,  ցուցադրություններ ու տեղեկատվություն փոխանակել»,- ասում է ՀՑԹԻ-ի տնօրենը:

Թանգարանի ձեռքբերումներից մյուսը հրապարակված անգլալեզու հանդեսն է, ինչպես նաև թվով երրորդ հայերեն հանդեսը: Այս տարի նաև կավարտվեն Հայոց ցեղասպանության մասին եռալեզու հայկական հանրագիտարանի կազմման աշխատանքները:

Թանգարանի տնօրենը հավելեց, որ լոբբիստական  խմբերի կատարած աշխատանքները, ակադեմիական մշակումները և օտարալեզու հրատարակությունները նպաստում են Ցեղասպանություն միջազգային ճանաչմանը: