Էկվադորի դատախազությունը հայտնել է երկրաշարժի 525 զոհերի մասին

Էկվադորում տեղի ունեցած ավերիչ երկրաշարժի զոհերի թիվ հասել է 525-ի: Այդ մասին, ինչպես տեղեկացնում է «Արմենպրես»-ը, հայտնել է հարավամերիկյան այդ պետության գլխավոր դատախազությունը:

Ներկայում ճանաչվել եւ ազգականներին են փոխանցվել 518 զոհվածների մարմիններ: Տարերքի հարվածից զոհվածների մեջ կան 11 օտարերկրացիներ, այդ թվում՝ Կուբայի, Կոլումբիայի, Դոմինիկյան Հանրապետության, Իռլանդիայի, Կանադայի քաղաքացիներ եւ Մեծ Բրիտանիայի հպատակներ: Հայտնի է, որ տուժել է ավելի քան 4 հազար մարդ:

Ինչպես ավելի վաղ հայտնել է երկրի նախագահ Ռաֆայել Կորեան, որոնողափրկարարական գործողության մասնակիցները կարողացել են փլատակներից դուրս բերել ընդհանուր առմամբ 54 մարդու: Երկրին երկրաշարժի պատճառած վնասն առայժմ գնահատվում է մոտավորապես 3 մլրդ դոլար:

Իշխանությունների կանխատեսումների համաձայն՝ երկրաշարժից հետո երկրի վերականգնումը կտեւի մի քանի տարի:

Ապրիլի 16-ի երեկոյան 7,8 մագնիտուդով երկրաշարժ է տեղի ունեցել Էկվադորի Մանաբի նահանգի Պեդեռնալես քաղաքի շրջանում, որը ամենաուժեղն է դարձել երկրում 1979 թվականից ի վեր, հաղորդել է ՏԱՍՍ-ը:

Լուսանկարը` AP