Միգրացիայի և սահմանային կառավարման ոլորտներում ԵՄ աջակցությունը կուղղվի նաև Մեղրիի անցակետի արդիականացմանը

Եվրամիության կողմից ֆինանսավորվող միգրացիայի ու սահմանների կառավարման ծրագրի շրջանակներում ընթացք կտրվի Հայաստանի պետական սահմանի Մեղրիի անցակետի արդիականացման նախագծին: Այս մասին ապրիլի 19-ին լրագրողների հետ զրույցում տեղեկացրեց ՀՀ ազգային անվտանգության խորհրդի աշխատակազմի ղեկավար Արամ Թանանյանը` նշելով, որ արդեն 6-7 տարի է` պետական սահման ի անցակետերում անվտանգության բարելավմանն ուղղված ծրագրեր են իրականացվում: «Այս ծրագրի շրջանակում մեկ քայլ առաջ ենք գնում, միգրացիոն որոշ հարցեր ենք ներառել դրանում ու պետական սահմանի Մեղրիի անցակետի վերակառուցման ծրագիրը: Սրա շրջանակում կիրականացվի  նախագծային փաթեթի մշակում, որի հիման վրա մեր երկիրը կդիմի եվրոպական ինստիտուտների աջակցությանը, նաև մեր բյուջետային միջոցներից հատկացումներ կլինեն: 3-4 տարի հետո կունենանք Մեղրիում արդիականացված անցման կետ կունենանք»,-ասաց պաշտոնյան: Նա հայտնեց, որ ներկայում կես միլիոն եվրո է հատկացվել հիշյալ անցակետի տարածքն ուսումնասիրելու և նոր անցակետի շինարարության նախագծային փաթեթը մշակելու համար: Դրա հիման վրա կդիմեն եվրոպական կառույցներին 20 միլիոն եվրո արժողությամբ աջակցության համար, որի արդյունքում ամբողջովին կարդիականացվի Մեղրիի անցակետը:

«Հիմա հյուսիսային սահմանում Բագրատաշեն-Բավրա-Գոգավան անցման կետերի արդիականացման աշխատանքներն են ընթացքի մեջ: Այդ ծրագրերն այս տարի կավարտենք և կունենանք ժամանակակից պահանջներին համապատասխան երեք անցակետ: Կկառուցվի Բագրատաշեն-Սադախլու անցակետերը միացնող նոր կամուրջ, որի շինարարությունը կտևի 2-3 տարի, և մենք կունենանք միանգամայն  բարեկարգված հյուսիսային սահման»,-հավելեց Արամ Թանանյանը:

ԱԱԽ պաշտոնյայի խոսքով` սահմանային անցակետերի բարելավման նպատակն այն է, որ քաղաքացիների համար սահմանահատման գործընթացները լինեն արագ, անխոչընդոտ, ժամանակակից պահանջներին համապատասխան, հարմարավետ ու առանց ավելորդ քաշքշուքների:

«Աջակցություն Հայաստանին միգրացիայի և սահմանների կառավարման ոլորտներում» ծրագիրը տևելու է երեք տարի, որի շրջանակներում կլինեն փորձի փոխանակման այցելություններ, որոշ չափով տեխնիկական աջակցություն ներգրավված մարմիններին, նախևառաջ` ԱԱԾ սահմանապահ զորքերին: Բացի այդ կանցկացվեն համաժողովներ, սեմինարներ, որ միջազգային փորձն ուսումնասիրվի ու մեր մասնագետները ստանան համապատասխան գիտելիքներ»,-ավելացրեց Արամ Թանանյանը:

Նրա խոսքով, մեխանիկական վերակառուցումից բացի, անցակետերում կներդրվեն ժամանակակից ընթացակարգեր, այսինքն՝ կաշխատեն մասնագետներ, ովքեր պատշաճ կերպով կսպասարկեն թե սահմանը հատող քաղաքացիներին, թե տնտեսավարող սուբյեկտներին: «Նախագահի հրամանագրով պետք է ներդրվի  «մեկ պատուհան-մեկ կանգառ» սկզբունքը պետական սահմանի անցման կետերում, որը ենթադրում է քաղաքացուն հնարավորինս քիչ ներգրավել բյուրոկրատական հարցերի մեջ, որպեսզի արագ ու հարթ անցնեն սահմանները»,-ասաց պաշտոնյան:

2016 թվականի ապրիլի 19-ին Երևանում կայացել է Միգրացիոն քաղաքականության մշակման միջազգային կենտրոնի կողմից նոր` «Աջակցություն Հայաստանին միգրացիայի և սահմանների կառավարման ոլորտներում» ծրագրի ներկայացումը, որն ամբողջությամբ ֆինանսավորվում է ԵՄ-ի կողմից: Ծրագրի նպատակը Հայաստանում միգրացիայի և սահմանների կառավարման ոլորտների համապատասխանեցումն է ԵՄ չափորոշիչներին: