ՀՀ ԳԱԱ-ի Ֆիզիկայի եւ աստղաֆիզիկայի բաժանմունքն ամփոփել է 2015թ-ի գործունեության արդյունքները

ՀՀ Գիտություններին ազգային ակադեմիայում ապրիլի 19-ին տեղի ունեցավ ՀՀ ԳԱԱ-ի Ֆիզիկայի եւ աստղաֆիզիկայի բաժանմունքի տարեկան ընդհանուր ժողովը: Հաշվետու տարում բաժանմունքի ինստիտուտների կողմից տպագրվել է` 210 հոդված, որից 117-ը՝ արտասահմանում, 132 թեզիս, 2 մենագրություն, 1 ուսումնական ձեռնարկ: Բաժանմունքի ինստիտուտները ստացել են 4 արտոնագիր: Այս մասին «Արմենպրես»-ին տեղեկացրին ՀՀ ԳԱԱ Տեղեկատվական-վերլուծական կենտրոնից:

Բաժանմունքի կազմում ընդգրկված են ՀՀ ԳԱԱ 11 ակադեմիկոս, 14 թղթակից անդամ և 30 արտասահմանյան անդամ:

Ժողովի ընթացքում 2015թ-ի գիտական և գիտակազմակերպական գործունեության հիմնական արդյունքները ներկայացրեց բաժանմունքի ակադեմիկոս-քարտուղար ՀՀ ԳԱԱ ակադեմիկոս Յուրի Չիլինգարյանը: Նա մասնավորապես ասաց. «Հունվարից գործող նոր գիտական կառույցը՝ Ռելյատիվիստական աստղաֆիզիկայի միջազգային կենտրոն-ցանց-Երեւան կենտրոնն Ազգային ժողովի որոշմամբ ստացել է միջազգային կազմակերպության պարգավիճակ (ICRANet-Հայաստան) եւ իրականացնում է հետազոտություններ տեսական, աստղամասնիկային ու բարձր էներգիաների աստղաֆիզիկայի բնագավառում»:

Ներկայացվեցին հետեւյալ գիտական զեկուցումները՝

• «Բլոխի վիճակները լույսի ծակոտկեն մետաղով անցման ժամանակ», զեկուցող՝ ֆ.-մ. գ.դ. ժ.Ս.Գևորգյան
• «Տարրական մասնիկների օպտիկա», զեկուցող՝ ՀՀ ԳԱԱ ակադեմիկոս Ա.Ռ. Մկրտչյան
• «Էպիտաքսիալ գրաֆենի նանոքիմիա և սիլիցիումի կարբիդի մակերևույթներն ու բաժանման սահմանները», զեկուցող՝ ՀՀ ԳԱԱ արտասահմանյան անդամ Պատրիկ Սուքիասյան (Ֆրանսիա)
• «Ածխածնային կառուցվածքներում մետաղական նանոմասնիկների ստացումը և կիրառության ոլորտները», զեկուցող՝ ֆ.-մ.գ.թ. Ա.Ս. Մանուկյան
• «Բյուրականի Շմիդտի դասի արդիականացված դիտակով ստացված առաջին գիտական արդյունքները»,   զեկուցող՝ ֆ.-մ.գ.թ. Տ.Հ. Մովսիսյան: 

ՀՀ ԳԱԱ-ի Ֆիզիկայի և աստղաֆիզիկայի բաժանմունքի կազմում ընդգրկված են՝ Բյուրականի աստղաֆիզիկական աստղադիտարանը, Ռադիոֆիզիկայի և Էլեկտրոնիկայի ինստիտուտը, Ֆիզիկայի կիրառական պրոբլեմների ինստիտուտը, Ֆիզիկական հետազոտությունների ինստիտուտը, «Գալակտիկա» ՓԲԸ-ն և ICRANet-Հայաստան կենտրոնը: