Ոստիկանության և հասարակության փոխհարաբերությունները. Երևանում մեկնարկել է միջազգային համաժողով

Հունիսի 4-ին Երևանում աշխատանքն է սկսել «Ոստիկանության և հասարակության փոխհարաբերությունները» խորագրով միջազգային համաժողովը, որը կազմակերպվել է ԵԱՀԿ երևանյան գրասենյակի անմիջական աջակցությամբ՝ Հայաստանի Հանրապետության ոստիկանության և Զինված ուժերի ժողովրդավարական վերահսկողության Ժնևի կենտրոնի միջև 2015 թ. գործողությունների շրջանակներում:

Ինչպես հայտնում են ՀՀ ոստիկանությունից՝ համաժողովի մասնակիցներին ողջույնի խոսքով դիմել է Հայաստանի Հանրապետության ոստիկանության պետ, գեներալ-լեյտենանտ Վլադիմիր Գասպարյանը:

ՀՀ ազգային ժողովի պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանն անդրադարձել է ոստիկանությունում ընթացող բարեփոխումներին ու հեռանկարներին:

ԵԱՀԿ երևանյան գրասենյակի ղեկավար, դեսպան Անդրեյ Սորոկինը ներկայացրել է Հայաստանի ոստիկանության հետ համատեղ իրականացված աշխատանքը համայնքային ոստիկանության մոդելի ներդրման, ընտանեկան բռնությունների դեմ պայքարի ծրագրի գործարկման, կադրերի վերապատրաստման և մի շարք այլ ուղղություններով:

Այնուհետև ելույթ է ունեցել Զինված ուժերի ժողովրդավարական վերահսկողության Ժնևի կենտրոնի փոխտնօրեն Ֆիլիպ Ֆլյուրին: Բարձր գնահատելով կառույցի փոխգործակցությունը Հայաստանի ոստիկանության հետ՝ դոկտոր Ֆլյուրին նշել է, որ նման համաժողովները գործընկերության ընդամենը երևացող մասն են, ուր ամփոփվում է ամենօրյա գործնական աշխատանքը ոստիկանության ծառայողների վերապատրաստման, նոր ծրագրերի իրականացման ուղղությամբ, ինչը միտված է ոստիկանության հանդեպ հանրային վստահության ամրապնդմանն ու հասարակություն-ոստիկանություն գործակցության սերտացմանը:

Համաժողովի առաջին մասը նվիրված էր հանցավորության կանխարգելման և հանրության ու ոստիկանության գործընկերության գործում համայնքային ոստիկանության դերին ու նշանակությանը:

«Հանրության վստահությունը՝ որպես ՀՀ ոստիկանության բարեփոխումների առաջնահերթություններից մեկը» զեկույցով հանդես է եկել ոստիկանության շտաբի կազմակերպական-վերլուծական վարչության բարեփոխումների և կառավարչական որոշումների համակարգման բաժնի պետ Լիանա Ամիրխանյանը:

Զինված ուժերի ժողովրդավարական վերահսկողության Ժնևի կենտրոնի փորձագետ Թիմ Փարսոնսը ներկայացրել է իր դիտարկումները քննարկվող հարցի վերաբերյալ:

ԵԱՀԿ քարտուղարության անդրազգային սպառնալիքների դեմ պայքարի վարչության ոստիկանական գործունեության ռազմավարական հարցերի ստորաբաժանման հետազոտությունների և վերլուծությունների հարցերով խորհրդական Թորսթեն Շտոդյեկն իր զեկույցում անդրադարձել է համայնքային ոստիկանության ձևավորման ու գործունեության վերաբերյալ ԵԱՀԿ մոտեցումներին:

Հայաստանում համայնքային ոստիկանության ներդրման ձեռքբերումներն ու մարտահրավերները ներկայացրել է ՀՀ ոստիկանության հասարակական կարգի ապահովման վարչության պետի տեղակալ Կարեն Մեհրաբյանը:

Համաժողովի երկրորդ մասում քննարկվել են շահագրգիռ պետական և ոչ պետական մարմինների հետ ոստիկանության համագործակցության խնդիրները: Գործընկերության նշանակությանն ու առանձնահատկություններին անդրադարձել է Զինված ուժերի ժողովրդավարական վերահսկողության Ժնևի կենտրոնի փորձագետ Դենիել Սիլվերսթոունը:

ԶՈՒԺՎ փորձագետ Կարմեն Վասիլը ներկայացրել է այս ոլորտում Արևելյան Եվրոպայի երկրների իրավապահ մարմինների փորձը: «Իրավական հետազոտությունների ազգային կենտրոն» հասարակական կազմակերպության նախագահ Տիգրան Երանոսյանն իր ելույթում անդրադարձել է Հայաստանում համայնքային ոստիկանության զարգացման ծրագրի շրջանակում գործընկերային մոդելի կիրառմանը, իսկ «Սոցիալական արդարություն» ՀԿ-ի նախագահ Արշակ Գասպարյանը գործընկերային մոդելը քննության է առել ընտանեկան բռնության հակազդման ուղղությամբ ՀՀ ոստիկանության կարողությունների զարգացման ծրագրի համատեքստում:

Ավարտին «ԶԼՄ-ների նշանակությունը հասարակություն-ոստիկանություն հարաբերությունների ձևավորման գործում» զեկույցով հանդես է եկել ՀՀ ոստիկանության հասարակայնության հետ կապի և լրատվության վարչության պետի տեղակալ Մուշեղ Կրոյանը՝ ներկայացնելով գործակցության առանձնահատկություններն ու խնդիրները:

Համաժողովի փակման խոսքով հանդես են եկել հասարակայնության հետ կապի և լրատվության վարչության պետի տեղակալ Մուշեղ Կրոյանը և Զինված ուժերի ժողովրդավարական վերահսկողության Ժնևի կենտրոնի փոխտնօրեն Ֆիլիպ Ֆլյուրին:

Համաժողովն անցել է առարկայական քննարկումների մթնոլորտում, մասնակիցները ներկայացրել են կոնկրետ հարցադրումներ և հիմնախնդիրների գործնական լուծման ուղիներ: