Անընդունելի են այն հայտարարությունները, որոնք կարող են վնասել ՌԴ-ի հետ դաշնակցային հարաբերություններին. Կորյուն Նահապետյան

Անընդունելի են բոլոր նախաձեռնությունները, կոչերն ու հայտարարությունները, որոնք կարող են վնասել Ռուսաստանի հետ Հայաստանի դաշնակցային ու ռազմավարական հարաբերությունները: Ազգային ժողովում լրագրողների հետ զրույցում նման կարծիք հայտնեց ԱԺ ՀՀԿ խմբակցության պատգամավոր, ԱԺ պաշտպանության, ազգային անվտանգության և ներքին հարցերի մշտական հանձնաժողովի նախագահ Կոր յուն Նահապետյանը՝ անդրադառնալով Հայաստանը ԵԱՏՄ կազմից դուրս բերելու կոչերին և խորհրդարանում նման բովանդակությամբ օրինագիծ շրջանառության մեջ դնելու նախաձեռնություններին:

«Ստեղծված իրավիճակում մենք ունենք լրջագույն մտահոգություններ՝ կապված նաև մեր ռազմավարական դաշնակցի առանձին գործողությունների հետ: Դրա մասին հրապարակային խոսում ենք և ակնկալում ենք, որ կլինեն կոնկրետ լուծումներ: Այսինքն, մեր ուղերձներն ու ակնկալիքներն այդ մասով շատ հստակ են, բայց այդ ամենով հանդերձ պետք չէ վնաս հասցնել այդ հարաբերություններին, որովհետև այսօր Հայաստանի Հանրապետության ռազմական անվտանգության ապահովման գործում մեր հարաբերությունները Ռուսաստանի հետ ունեն առաջնային նշանակություն»,- «Արմենպրես»-ի հաղոդմամբ՝ նշեց Նահապետյանը:

Նրա խոսքով՝ ստեղծված իրավիճակում հապճեպ քայլեր պետք չէ ձեռնարկել: Տարբեր քաղաքական ուժեր, պատգամավորներ կարող են հանդես գալ նախաձեռնություններով՝ ելնելով իրենց աշխարհաքաղաքական ընկալումներից և այն պատկերացումներից, որ ունեն ստեղծված իրավիճակից ելքեր գտնելու իմաստով: «Բայց անընդունելի եմ համարում բոլոր այն կոչերն ու նախաձեռնությունները, որոնք կարող են վնասել Ռուսաստանի հետ մեր դաշնակցային հարաբերություններին»,- եզրափակեց պատգամավորը:

Ազգային ժողովի անկախ պատգամավոր Խաչատուր Քոքոբելյանը խորհրդարանում շրջանառության մեջ է դրել օրենքի նախագիծ, որով առաջարկվում է Հայաստանը դուրս բերել Եվրասիական տնտեսական միության կազմից: