Ադրբեջանում պրոբլեմային վարկերը կաճեն. Fitch

Միջազգային վարկանիշային Fitch գործակալության Ադրբեջանի բանկային հատվածի գնահատականի վերաբերյալ զեկույցում ասվում է, որ համաշխարհային շուկայում նավթի գների կտրուկ անկման ֆոնին մանաթի արժեզրկումը  բացասաբար է ազդել Ադրբեջանի բանկերի վրա եւ դժվարություններ է ստեղծել պրոբլեմային (չվերադարձվող ) վարկերից վնասը ծածկելու համար:

Ինչպես հաղորդում է «Արմենպրես»-ը, Fitch-ը հայտնել է, որ Ադրբեջանում պրոբլեմային վարկերի ծավալը շարունակելու է աճել:

Fitch-ի փորձագետները գտնում են, որ 20015 թվականի արդյունքներով վարկերի գումարային ծավալում պրոբլեմային վարկերի տեսակարար կշիռը  (90 օրից ավելի) 9,5 տոկոսով մեծացել է: Նշվում է, որ 2014 թվականի վերջին այդ ցուցանիշը կազմել էր 8,3 տոկոս: Ներկայում Ադրբեջանում պրոբլեմային վարկերը կազմում են մոտ 1 մլրդ 400 մլն մանաթ:

Արժույթի միջազգային հիմնադրամը Ադրբեջանի ՀՆԱ-ի անկումը 2016 թվականի համար կանխատեսում է 3 տոկոս մակարդակի: Այս մասին նշվում է համաշխարհային էկոնոմիկայի ապրիլյան կանխատեսման մեջ (World Economic Outlook, WEO):

Անցյալ տարվա հոկտեմբերին ԱՄՀ-ը Ադրբեջանի ՀՆԱ-ի աճը 2016 թվականի համար կանխատեսել էր 2,5 տոկոս մակարդակի: Հիմնադրամի կանխատեսումներով` 2016 թվականին Ադրբեջանում միջին տարեկան արժեզրկումը կկազմի 12,8 տոկոս եւ 2017 թվականին կդանդաղի մինչեւ 9,5 տոկոս:

Հիմնադրամի գնահատականներով` 2016 թվականին Ադրբեջանի վճարային հաշվեկշռում դեֆիցիտը կկազմի ՀՆԱ-ի 0,2 տոկոսը:

«Ազադլըգ» թերթը հայտնել է, որ Ադրբեջանի համախառն ներքին արդյունքի (ՀՆԱ) ծավալը 2016 թվականի հունվար-փետրվարին, նախորդ տարվա նույն ժամանակաշրջանի համեմատ, նվազել է 3,4 մլրդ դոլարով կամ 40 տոկոսով:

«Թուրան» լրատվական գործակալությունը, հղում կատարելով Ադրբեջանի պետական մաքսային կոմիտեին, հաղորդել է, որ Ադրբեջանի արտաքին առեւտրաշրջանառությունը 2016 թվականի հունվար-փետրվարին կազմել է 2,2 մլրդ դոլար, ինչը 45,5 տոկոսով փոքր է` 2015 թվականի նույն ժամանակաշրջանի հետ համեմատ:

Ըստ «Ազադլըգ» ռադիոկայանի` ադրբեջանցի հայտնի տնտեսագետ Գուբադ Իբադօղլուն համոզմունք է հայտնել, որ «Ադրբեջանի տնտեսության անկումն արդեն երեք ամիս է` սկսված է»:

Ադրբեջանի կառավարությունը 2016 թվականին կանխատեսում է ՀՆԱ-ի 1,8 տոկոս աճ եւ 12,1 տոկոս միջին տարեկան արժեզրկում:

ՀԲ-ի կանխատեսմամբ` 2016 թվականին Ադրբեջանի արտաքին պարտքի չափը կգերազանցի ՀՆԱ-ի 30 տոկոսը: ՀԲ-ն միջին հեռանկարում Ադրբեջանի ընդհանուր պարտքերի աճ է կանխատեսում:

ՀԲ-ն կանխատեսում է, որ Ադրբեջանի ընդհանուր պարտքերը 2017 թվականին կկազմեն ՀՆԱ-ի 35,6 տոկոսը, 2018 թվականին` ՀՆԱ-ի 54,7 տոկոսը:

Ադրբեջանի կառավարության հայտարարությունների համաձայն` 2016 թվականի սկզբներին Ադրբեջանի արտաքին պարտքի ծավալը կազմել է ՀՆԱ-ի 19,8 տոկոսը: Այդ ցուցանիշը 2015 թվականի սկզբներին կազմել էր 8 տոկոս:

2016 թվականի հունվարի 1-ի դրությամբ Ադրբեջանի արտաքին պարտքը կազմել էր մոտ 7 մլրդ դոլար:

Ադրբեջանական ԶԼՄ-ներն ավելի վաղ հայտնել են, որ անցյալ տարվանից նավթի համաշխարհային գների անկման հետեւանքով ադրբեջանական մանաթի 100տոկոսով արժերկման պատճառով 2016 թվականի սկզբից մինչ այժմ Ադրբեջանի ՀՆԱ-ն 40 տոկոսով նվազել է, Ադրբեջանի արտաքին առեւտրաշրջանառությունը մոտկիսով չափ կրճատվել է, Ադրբեջանի տնտեսությունն սկսել է արագորեն անկում ապրել, վարկային փոխառուների թիվն արդեն հասել է 2,6 մլն մարդու:

Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձեւավորվում է էներգակիրներիարտահանումից ստացվող եկամուտների հաշվին: