NEWS.am STYLE Exclusive. Ամերիկահայ հայտնի պարող Միհրան Կիրակոսյանը` աստղային համագործակցությունների եւ «Եվրատեսիլի» մասին

Ամերիկահայ հայտնի պարող եւ խորեոգրաֆ Միհրան Կիրակոսյանին Հայաստանում ճանաչում են, որպես աստղային պարող, որը, չնայած երիտասարդ տարիքին, արդեն հասցրել է համագործակցել աշխարհի ամենահայտնի աստղերից շատերի` Մադոննայի, Ռիկի Մարտինի, Սելենա Գոմեսի, Շակիրայի. Բրիթնի Սփիրսի, Արիանա Գրանդեի եւ այլոց հետ:

2010 թ-ին նա երգչուհի Էմմիի հետ մասնակցեց «Եվրատեսիլ» երգի մրցույթի հայաստանյան նախընտրական փուլին: Չնայած երգիչներին չհաջողվեց ստանալ ուղեգիր դեպի Եվրոպայի ամենահեղինակավոր երաժշտական մրցույթ` նրանց Hey զուգերգը համարվում էր այդ տարվա ֆավորիտներից:

Արդեն տեւական ժամանակ է պարողը չի այցելել Հայատան: NEWS.am STYLE-ը կապ հաստատեց Միհրանի հետ՝ պարզելու, թե ինչ նախագծերով է զբաղված խորեոգրաֆն այս շրջանում.

-Միհրան, ե՞րբ եք վերջին անգամ եղել Հայաստանում:

-Վերջին անգամ Հայաստանում եղել եմ 6 տարի առաջ՝ 2010 թ-ին: Հիմա երբ հետ եմ նայում, բավականին, երկար ժամանակ է անցել…

-Հայտնի է, որ երկար ժամանակ համագործակցել եք Մադոննայի, Ռիկի Մարտինի, Սելենա Գոմեսի եւ մի շարք այլ աշխարհահռչակ երգիչների հետ: Այսօր շարունակո՞ւմ եք իրականացնել նման աստղային համագործակցություններ:

-Այլեւս չեմ պարում արտիստների հետ: Այժմ նրանց հետ համագործակցում եմ, որպես խորեոգրաֆ եւ ռեժիսոր: Այս ընթացքում աշխատել եմ ամերիկյան The Voice նախագծի վրա: Աշխատում եմ թե արտիստների, թե նրանց մասնակիցների շուների վրա, համագործակցում եմ ժյուրիի անդամների` Շակիրայի, Սի Լո Գրինի եւ Բլեյք Շելդոնի հետ: Մեզ հետ աշխատում են նաեւ այլ տաղանդավոր խորեոգրաֆներ եւ ռեժիսորներ:

Բացի դա, որպես խորեոգրաֆ աշխատել եմ մի շարք արտիստների կենդանի շոուների վրա: Նրանց թվում են` Ludcaris-ը, Վիկտորիա Ջասթիսը, Big Time Rush-ը, Սելենա Գոմեսը, Afrojaցk-ը, Եվա Սիմոնսը, Քելլի Ռոուլանդը եւ այլք:

Եղբորս` Գոռ Կիրակոսյանի եւ հորս` Կարո Կիրակոսյանի հետ այժմ աշխատում ենք պարային մի շոուի վրա: Հուսով եմ` այն կներկայացնենք նաեւ Հայաստանում:

Այժմ ունեմ նաեւ իմ պրոդյուսերական ընկերությունը, որը հիմնել ենք եղբորս հետ միասին: Այն կոչվում է Mihran K. Productions, որը զբաղվում է ֆիլմերի, գովազդների, տեսահոլովակների եւ բեմականացումերի ստեղծմամբ:

-Այդքան հայտնի արտիստների նշեցիք… Իսկ կա՞ մեկը, որի հետ դեռեւս չեք աշխատել, բայց շատ կցանկանայիք իրականացնել նաեւ այդ համագործակցությունը:

-Եթե պարելու մասին է խոսքը, ապա այլեւս ցանկություն չունեմ որեւէ աստղի հետ պարելու: Այդ երազանքս իրականացրել եմ տարիներ առաջ: Այժմ կյանքիս այլ փուլում եմ գտնվում, որտեղ երազանքներս եւ նպատակներս այլ են:

-Հանդես եք եկել նաեւ որպես երգիչ: Նոր երգեր եւ տեսահոլովակներ այլեւս չե՞ք պատրաստվում ներկայացնել:

-Երբեք ինձ չեմ համարել ռեփեր կամ երգիչ: Ես դա արել եմ միայն հաճույքի համար եւ շատ ուրախ եմ, որ մարդիկ ինձ ընդունեցին նաեւ այդ տեսանկյունից: Այժմ ինքս եմ աշխատում շատ արտիստների հետ, զբաղվում եմ նրանց մենեջմենթով: Հիմա MiMOSA անունով հայտնի դիջեյի մենեջերն եմ:

Շարունակությունն այստեղ: