Հրազդանում լարված է. Ալեն Սիմոնյանին և Արայիկ Հարությունյանին սպառնացել են

Քիչ առաջ տեղեկատվություն տարածվեց, որ Հրազդանի քաղաքապետ Արամ Դանիելյանի նախընտրական շտաբերից մեկի պետը հարձակում է գործել «Քաղաքացիական պայմանագիր» կուսակցության վարչության նախագահ Արայիկ Հարությունյանի և araratnews.am կայքի գլխավոր խմբագիր Ալեն Սիմոնյանի վրա։ 

Past.am-ին մանրամասներ հաղորդեց Ալեն Սիմոնյանը:

Վերջինիս խոսքով՝ ինքը, որպես լրագրող, ահազանգ է ստացել առ այն, որ ընտրակաշառք են բաժանում: «Մեկնեցի Արայիկ Հարությունյանի հետ, ներկայացա, իմ վզին նաև կախված էր լրագրողական բեյջը, հարցրեցի, թե ով է շտաբի պետը, որից հետո ինձ ասացին՝ գնա, գրի սենց, իսկ ես ասացի՝ չեմ գրում, դուք ինձ ինչ ասում եք, ես այդպես կներկայացնեմ: Հետո նա վրդովվեց, բերեց իր տղերքին, որ մեզ ծեծի ենթարկեն, մեր ավտոմեքենան ջարդեն, սկսվեց հրմշտոց: Ուզեցանք դուրս գալ, որպեսզի չլարենք վիճակը: Դռան մոտ չգիտեմ՝ ինչով հարվածեցին ձեռքիս, երևի երկաթով:Շտաբի պետը կոչեր էր անում, որ մեքենաս ու մեզ ջախջախեն: Այդ ամենը տեսանկարահանված է:Զանգեցինք ոստիկանություն, մինչև հիմա այնտեղ ենք»,- պատմեց Ալեն Սիմոնյանը:

Հիշեցնենք, որ կիրակի՝ ապրիլի 17-ին, Հրազդանում տեղի կունենան քաղաքապետի ընտրություններ: Գործող քաղաքապետի մրցակիցներից է «Քաղաքացիական պայմանագիր» կուսակցության ներկայացուցիչ Սասուն Միքայելյանը:

Լևոն Փանոսյան