Գեղարքունիքում անհրաժեշտ են համարում Արցախին օգնություն հատկացնել նաեւ դրամի տեսքով

Գեղարքունիքի մարզի համայնքներում շարունակվում է ամենատարբեր տեսակի օգնության տրամադրումը Արցախի բնակչությանը, առաջնագծում գտնվող զինծառայողներին եւ կամավորներին: Ինչպես տեղեկացրին Գեղարքունիքի մարզպետարանի աշխատակազմից, ապրիլի 12-ի դրությամբ արդեն Արցախին օգնության ձեռք են մեկնել 40 համայնքներ, մնացած համայնքները եւս ձեռնարկում են օգնության իրենց բաժինը: «Արմենպրես»-ի տեղեկացմամբ՝ այսօր հրավիրված աշխատանքային խորհրդակցության ընթացքում Գեղարքունիքի մարզպետ Ռաֆիկ Գրիգորյանը տեղեկացրեց, որ Արցախին օգնությունը համակարգող կառույցի կողմից հրահանգվել է սննդի եւ առաջին անհրաժեշտության պարագաների կողքին կարեւորել նաեւ դրամական օգնությունը:

«Արցախին տրվող օգնությունը համակարգող կառույցում գտել են, որ սննդի եւ առաջին անհրաժեշտության պարագաների տեսքով տրվող օգնություններն արդեն բավարար են, իսկ ավերված բնակավայրերի եւ այլ խնդիրների լուծման համար ավելի քան անհրաժեշտ է դրամական օգնությունը, որը եւ առաջիկայում մեր մարզի կազմակերպությունների եւ բնակիչների կողմից կփոխանցվի համապատասխան հաշվեհամարներին: Իհարկե, դա չի նշանակում, թե մարզում կսահմանափակվի մյուս կարգի օգնությունը»,-նշեց մարզպետ Ռաֆիկ Գրիգորյանը:

Գեղարքունիքի մարզպետի տեղակալ, Արցախին ուղղվող օգնությունը համակարգող Անդրանիկ Հակոբյանի տեղեկացմամբ՝ մարզի կազմակերպությունների կողմից արդեն կատարվում է ակտիվ դրամական հանգանակություն, որը մոտակա մեկ-երկու օրերի ընթացքում կփոխացվի Արցախի օգնության ֆոնդին:

Խոսրով Խլղաթյան